Shillong, Nailar 30: U Myntri Rangbah ka jylla u Conrad K Sangma ha ka sngi Thohdieng u la ong ba ka sorkar ka la buh ïa ki 50 tylli ki jaka ri dfohkha ha kane ka jylla kaba long ruh kum ka jingthmu ban kyntiew ïa ki kam ri dohkha ha kane ka jylla.
“Da kaba buh ïa kine ki jaka pdem dohkha kumba 50 tylli kan long ka jingmyntoi ïa ka jylla. Ngi dang pyrshang ban kyntiew ïa ka jingpynmih dohkha ha ka jylla na ka daw jong ka jingdawa kaba jur,” ong u Sangma haba jubab ïa ka jingkylli hapoh ïingdorbar thaw aiñ.
U la ong ba na kine, kumba 9 tylli ki jaka pdem dohkha ki la treikam bad kumba 41 tylli yn sa pyntreikam shen.
Katkum ka jingïathuh jong u ka jylla ka la mad shibun ka jingkyrduh dohkha kaba la kot sha ka 12,000 metric ton kaba la kot ruh ha ka jinglut kaba T. 250 klur.
U la ïathuh ruh ba ka la don ka por ba ka jylla Meghalaya ka thied kumba 75 percent ka dohkha na shabar jylla. “Mynta hadien jong ka jingtuklar kumba 3 pawa la lah ban pynmih na ka jylla. Wat la ka la long kaba shim por hynrei ngi la ïaid ha ka lynti ban poi sha ka thong,” ong u Sangma.
Na ka liang u Myntri Rangbah ka jylla u la pyntip ruh ba na ka jingai jinghikai ban kyntiew ïa ki kam ri dohkha ha ka jylla, na ka liang jong ka sorkar ka la ai ruh ki symbai kumba 5 million eiei.
U la ïathuh ba kumba T. 67 haduh T. 72 klur ka sorkar ka la pynlut ban kyntiew ïa ka kam ri dohkha ha ka jylla ha kine ki 2 bad 4 snem ba la leit.
Ha kajuh ka por na ka liang u Myntri Rangbah ka jylla u la pynbna ba ka ka sorkar kan sa pynmih ïa ki kyndon ha kaba ïadei bad ka kam pynïakob khwai dohkha ha ka jylla.
“Ngi dang don ha ka lynti ban thaw ïa ki kyndon. Ngi dang pynkhreh ïa ki jingkdew lynti bad ngin sa ïasyllok bad ki riew shemphang ha kaba ïadei bad kane ka kam,” u la ong.
