Shillong, Nailar 30: U Myntri ka tnat Pule Puthi ka sorkar jylla u Rakkam A Sangma ha ka sngi Thohdieng u la pyntip hapoh ka Ïing Dorbar ba ka jing pynrung briew hapoh ka District Institute of Education and Training (DIET), Nongstoiñ ym lah satia ban kyntiew kaba long ruh katkum ki kyndon jong ka National Council for Teacher Education (NCTE). Hynrei u la pynthikna pat ba ka sorkar shen kan sa ïakren bad ka NCTE ha kaba ïadei bad ka jingai jingbit bad ka jingïarap pisa na ka sorkar pdeng.
Ïa kane u la jubab halor ka phang ba la wanrah da u MLA ka UDP na Mawkyrwat u Bah Renikton Lyngdoh Tongkhar, uba la kyrpad ïa ka jingdonkam ban kyntiew ïa ki seat ha DIET, Nongstoiñ, West Khasi Hills District.
Na ka liang u Sangma u la ong ba katkum ki kyndon jong ka NCTE, ka jingdon jong ki jaka ka long 50 seat bad ym lah satia ban kyntiew naba ïa ka jingai jingbit la shah tang haduh 50 tylli ki seat.
“Nga ïathuh ba ka jingdon ki jaka bad ki jingtei ha DIET Nongstoiñ, ka dei kaba ym lah satia ban kyntiew hynrei ïa kane ka kam yn sa ïakren bad ka NCTE na ka bynta ki jaka bad yn shim khia ruh bad ka Ministry of Education, ka sorkar pdeng ban ïoh ki lad jingïarap pisa,” la pynthikna u Myntri.
Shuh shuh u Myntri u la pynthikna ba ka DIET Nongstoiñ la lah ban ithuh da ka Ministry of Education (MoE) hapoh ka Samagra Shiksha Abhiyan kum kawei na ki DIETS – Centres of Excellence (CoE) na ka bynta ka snem 2024 – 25 bad da kane ka jingithuh, ka DIET, Nongstoiñ yn sa lah ban kyntiew kyrdan ha kaba ïadei bad ki lad jingtei bad kiwei pat ki kam kiba donkam.
U la ong bad a kane ka jingthmu kaba ïar kan sa pynïasoh bad ka jingthmu ka CoE, bad kiwei kiwei ki kam kiba long ruh hapoh ka Four Year Integrated Teacher Education Programme (ITEP) khnang ban ïoh ruh ïa ki nonghikai kiba biang na kane ka thaiñ.
` U la ong ba kin don kumba 30% jong ki seat ba la buh na ka bynta ki samla pule kiba leit ha ka subjek Science bad Mathematics kiba ha ki klas XII.
Shuh shuh na ka liang jong u Myntri u la pynthikna ba ka sorkar jylla hapoh ka tnat pule puthi kan sa phah ïa ka Detail Project Report (DPR) haba ïadei bad ka DIET Nongstoiñ sha ka sorkar pdeng lyngba ka Samagra Shiksha Abhiyan, Meghalaya hadien ba la ïoh ka jingbthah napoh ka Ministry of Education (MoE).
“Sa kawei pat ka jingïaid lynti ka long ban pyntip ba ïa ka ADB Project, la lah ban tei da kawei pat ka kamra klas ha DIET, Nongstoiñ West Khasi Hills District, kaba long ka jingdonkam jong ki samla pule ki nonghikai bad kiwei kiwei. Halor kine ki jingshisha ka sorkar kan sa leit ban kynduh ïa ka National Council for Teacher Education (NCTE) ka ban long ruh kum ka jingdonkam kiba ïaid katkum ki kyndon,” u la bynrap.
