Shillong, Nailar 30: Ka sorkar jylla ka dang ap ka jubab na ka sorkar pdeng ha kaba ïadei bad ka jingdonkam ban pyntreikam ïa ka Meghalaya Residents Safety and Security (Amendment) Bill, 2020 kaba ïaid ruh katkum ki kyndon jong ka riti synshar jong ka ri bad kane ka aiñ kam shym la khang satia ïa ka jingwan rung ki briew kiba nabar sha ka jylla.
Ha kajuh ka por ban pyntreikam ïa kaei kaba la bthah da ka ïingbishar ban buh ki jaka ban pynsuk ne ki facilitation centre na ka liang jong ka sorkar jylla ka la pyntreikam ïa ki kyndon jong ka MRSSA, 2016 kaba nyngkong ban ïoh ki jingithuh ha kaba ïadei bad ki nongshong wai bad kumba ka long mynta ki la don haduh 16 tylli ki shnong kiba la pyntreikam ïa kane ka aiñ kaba nynkong ne orginal Act.
Ïa kane la pyntip da u Symbud Myntri Rangbah ka jylla u ba khmih ruh ïa ka tnat ki Kam Pohïing u Bah Prestone Tynsong hapoh ka ïing dorbar haba jubab ïa ka phang ba la wanrah da u nongïalam ka TMC bad u Myntri Rangbah barim ka jylla u Dr. Mukul Sangma.
Ïa kane ka phang hadien la weng noh da kaba kyntu ruh ïa ka sorkar ba kan pyntreikam ïa ka MRSSA, 2016 kumba ka dei ban long na ka bynta ka bha ka miat jong ki nongshong shnong jong ka jylla.
Na ka liang jong ka tnat ki Kam Pohïing ka Sorkar pdeng ne ka Ministry of Home Affairs (MHA) lyngba ka shithi kaba 16 tarik u Jylliew, 2023 ka la pyntip sha ka sorkar jylla ba kane ka Bill kaba la tyrwa ka la long palat ïa ka jingmut jong ka Meghalaya Residents Safety and Security Act, 2016 (MRSSA) kaba la wad bniah ïa ki jnit ki jnat jong ki briew kaba la long palat wat ïa kiba shu shongwai kiba wanrung sha ka jylla da ki jingshah pynshitom bapher bapher lada kim bud ïa ki kyndon. Kane ka aiñ kaba la tyrwa ka la pynkheiñ ruh ïa ka Article 19 (1) (d) bad (e) jong ka riti synshar jong ka ri”. Kum kane ka donkam ïa ka jingpynshai na ka sorkar jylla bad la ai jingmut ruh ba ka sorkar jylla kadei ban pyrkhat biang halor kane ka aiñ ne ka Bill.
Halor kane na ka liang jong u Bah Tynsong u la pyntip ba ka sorkar jylla ka la jubab halor kitei ki jingai jingmut da ka sorkar pdeng lyngba ka shithi kaba 21 tarik u Rymphang, 2023 ha kaba ka sorkar jylla ka la pyntip ba kane ka Bill kam shym la pynkheiñ ïa ka Article 19 jong ka riti synshar jong ka ri kane ka aiñ ka long ruh ban pynkhlaiñ ïa ka MRSS Act.
“Shuh shuh lyngba ka DO kaba 14 tarik mynta u bnai, 2024, la phah biang ïa ka shithi sha Union Home Secretary da u Chief Secretary da kaba ban jur halor ka jingtreikam ïa kane ka Bill ka bym khang satia ïa ka rung ka mih sha ka jylla hynrei ka dei tang ka jingwad jingtip halor ka jingwan ki briew kiba nabar khnang ba kan lah ban buh jingthoh kaba long ruh hapoh ka Article 19 (5) jong ka riti synshar jong ka ri,” u la ong da kaba ïathuh ruh ba ka sorkar ka dang ap ïa ka jubab na ka sorkar pdeng lyngba ka tnat Home Affairs ha kaba ïadei bad kane ka kam.
“Na ka liang ka sorkar ka la pyntreikam ïa ki bynta jong ka aiñ ban ïoh ka jingithuh ïa ki nongshong wai lyngba ka jingthaw ïa ka District Task Force ha baroh ki district jong ka jylla. Nga ai khublei ïa ki Dorbar Shnong ka Shillong, kiba la wan shakhmat ban pynrung kyrteng bad kumjuh ruh ïa kito kiba la sdang ban pyntreikam ïa ka aiñ da kaba lum jingtip ïa ki nongshong wai. Nga ngeit ba ngin lah ban pyntreikam ïa kane shakhmat bad ha baroh ki district lyngba ki District Task Force,” ong u Bah Prestone.
Shuh shuh u Bah Tynsong u la pyntip ruh ba ïa kane ka kam jong ka Meghalaya Residents Safety and Security (Amendment) Bill, 2020 kaba la khmih bniah da u Lat na ka bynta ban ïoh ka jingmynjur jong ka President, na ka liang ka sorkar ka la dang buddien bad ka MHA.
“Ngi la phah ïa ki jingjubab kiba bniah bad ïa kane ka kam la nang buddien da u Myntri Rangbah ka jylla ha ka jingïalang kaba la long bad u Myntri ka tnat ki kam Pohïing ka sorkar pdeng ha Delhi dangshen bad kane ka jingïalang ka la long ha ka 15 tarik u Naitung, 2024,”u la ong.
Shuh shuh na ka liang u Bah Tynsong u la pyntip ba ka sorkar ka la khmih bniah ruh ïa ki jingpynbna kaba 17 tarik u Nohprah, 2020 na ka bynta ban buh ïa ki Facilitation Centres hapoh ka jaka rung jaka mih kaba ha Umling ha Ri Bhoi, Shillong Airport ha Umroi Airport bad Mendipathar railway station kaba ha North Garo Hills kiba dei ruh katkum ki hukum ba la pynmih da ka Meghalaya High Court halor ka PIL kaba long halor ka jingtreikam jong ka MRSSA, 2016.
Ka hukum jong ka Meghalaya High Court kaba 2 tarik u Nohprah, 2021 kaba ong bad kaba kren shai halor ka jingbuh kyndon ïa ka rung ka mih ki nongshong shnong ka ri kaba lah ruh ban ym pyntreikam.
“Kum ban buddien ïa ka hukum jong ka High Court kaba 2 tarik u Nohprah, 2021 bad ban bud ryntih ïa ki hukum, la pynmih ïa ki jingpynbna ha ka 17 tarik u Nohprah, 2020 na ka bynta ban buh ïa ki Facilitation Centre kaba la bud ruh ïa ki kyndon haduh mynta tat haduh ban pynbna da kumwei pat,” ong u Bah Tynsong da kaba bynrap ruh ba na ka daw jong ka wan ka khlam Covid-19, ka jingbuh ïa ki Facilitation Centre ha Umling ha Ri Bhoi District, Shillong Airport bad ha Umroi, Ri Bhoi bad Mendipathar railway station, North Garo Hills District la aiti noh sha ka tnat Health & Family Welfare ban pyndonkam kum ki Covid-19 screening centre.
U la ong ba wat ba ka jylla ka la bud ïa ki jingbthah jong ka Ïingkashari ban buh ïa ki Facilitation Centre ka jingpyntreikam ïa kiwei ki kyndon jong ka aiñ khlem la lah ban bud bad na ka liang ka sorkar ka la ïaid shakhmat ban pyntreikam ïa ki kyndon ban wad bniah halor ka jingwan jong ki briew kiba nabar ne kiba shong wai ha ka jylla.
Ki kyndon 6,7,8,9 bad 10 jong ka aiñ ki pynpaw ïa ka jingdonkam ban ithuh ïa ki nongshong wai bad kumjuh ruh ban buh ïa ki kyrteng haduh katno kin shong wai kaba long ruh hapoh ka jingbatai kaba la don hapoh ka District Task Force.
Ban pynsuk ha kaba ïadei bad ka jingpynrung kyrteng kaba long hapoh ka MRSSA bad ban pynthikna ruh lyngba ka jingkheiñ na ka liang ka sorkar ka la plie ruh ïa ka online portal ha ka 8 tarik u Nailur, 2022, kaba lah ban peit lyngba ka https://megrssa.nic.in. Ki nongshong shnong kiba lah ban khmih ïa kane ka lad pathai khubor ki dei ki nongshong wai, ki trai ïing, ki bor pynïaid shnong, ki rangbah shnong, ki police station bad ki district task force.
Ïa kane ka online portal la thaw ban pynsuk ban buh jingkheiñ da ki bor ba dei khmih kaba long ruh katkum ka jingbthah jong ka aiñ.
La ong ba ïa kane ka online portal la pyntreikam ha ki 7 tylli ki shnong kiba hab hapoh ka East Khasi Hills District kum ka shnong Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng.
Ïa ka jingpyntreikam ïa kane ka aiñ la leh hapdeng ka jingïasyllok bad jingïamynjur jong ki dorbar shnong.
Katkum ka kyndon 3 jong ka aiñ, ki nongshong wai ki dei ban pyndep ïa baroh ki jingbthah halor ki jingsah wai jong ki, kaba donkam ruh ba kin ai jingtip sha ki bor jong ki pulit. Ka kyndon 7 jong ka aiñ ka bthah ruh ïa ki nongai wai ba ki dei ban pyntip sha ki bor shnong halor ka jingai wai jong ki ïa ki ïing ki sem sha ki briew kiba nabar.
Ha kaba ïadei bad kane ka kyndon la pyni ruh ba ki rangbah shnong ne ki dolloi ne ki nokma ki don ïa ka bynta kaba khraw ban pynithuh ïa ki nongshong wai.
Shuh shuh na ka liang jong u Bah Tynsong u la pyntip ba kumba ka long haduh mynta ki la don haduh 87 tylli ki shnong bad 177 tylli ki shnong kiba rit ha East Khasi Hills kiba la pynrung hapoh ka MRSSA portal.
“Na kine kumba 16 tylli ki shnong ki la sdang ban pyntreikam ïa kane ka aiñ, bad kumba ka long mynta ki la don 183 ngut ki nongshong wai kiba la pynrung kyrteng ïalade hapoh ka portal,” u la ong da kaba pyntip ruh ba nalor ka district task force ha East Khasi Hills, ki la don ruh ki jingïalang ba la pynlong da ki district task force ha baroh ki district na ka bynta ban pyntreikam ïa ka MRSSA, 2016.
