Shillong, Nailar 30: U Chief Executive Member jong ka Khasi Hills Autonomous District Council u Bah Pynïaid Sing Syiem, ha ryngkatlang bad u Deputy CEM u Bah P N Syiem bad kiwei pat ki executive member ki la leit jngoh ïa u Lat ka jylla u C.H. Vijayashankar. Ïa ki la pdiang sngewbha lyngba ki riam tynrai ha kaba na ka liang jong u CEM u la pdiang sngewbha ruh ïa u Lat ka jylla uba la wan sha kane ka jylla.
Ha kane ka jingïalang bad ka jingïakynduh na ka liang jong u Lat ka jylla u C.H. Vijayashankar u la ïaroh ïa ka Meghalaya halor ka jingdon ïa ka mariang kaba itynnad. U la ban jur halor kiba bun ki kam kiba ïadei dur bad ka jylla bad ki nongshong shnong. U la kyntu ruh halor ka jingdonkam ban kyntiew ïa ka pule puthi ha ka jylla.
Na ka liang u Lat ka jylla u la pynpaw ruh ha ki jingeh ba ka jylla ka mad mynta ha kaba ïadei bad ki kam drok bad kumno ban ïakhun ïa u. U la banjur ruh halor ka jingdonkam ban thung ïa ki dieng kiba long katkum ki riti dustur jong ka jylla khnang ban pynneh pynsah ïa ka mei mariang.
Shuh shuh u CEM bad kiwei ki dkhot ki la batai lyngkot ruh halor ka imlang sahlang jong ka jylla, kaba kynthup ia ki shnong ki thaw kiba dei ki Village Dorbar bad ki Ilaka Institution Council, bad kiwei pat ki bynta bad ki jingkitkhlieh. Ki la batai ruh halor kiba bun ki kam ba la leh da ka KHADC kiba thmu ban pynneh pynsah ïa ki riti dustur, ka sawdong sawkun bad kiwei ki kam ban kyntiew ïa ka imlang sahlang.
Na ka liang jong kitei ki nongmihkhmat ki la khot sngewbha ruh ïa u Lat ka jylla ba un leit jngoh ïa ka Law Kyntang bad ka Shnong Khasi ne ka Khasi village kaba ha Mawphlang. Na ka liang jong u Lat u la pdiang sngewbha ïa kane ka jingtyrwa jong ki ba un leit jngoh ïa ka Mawphlang ha ka 3 tarik u Nailur.
Na ka liang jong u Lat ka jylla u C.H. Vijayashankar u la pynpaw ïa ka jingai khublei ïa ka KHADC bad pynthikna ruh ïa ka jingkyrshan ban kyntiew lem ïa ki kam pynroi kiba donkam ha ki shnong ki thaw.
