Dawa ka RBYF Western Zone na ka sorkar ba dei ban leh bniah ka jingïapynbeit pud ha ka wat kaba ar bad ym da kaba rah kti

Nongpoh, Nailar 22: Ka Ri Bhoi Youth Federation Western mynta ka sngi ka la mih shakhmat ban ïa kren halor ki kam pynbeit pud pynbeit sam hapdeng ka sorkar Meghalaya bad ka sorkar Assam, kaba dei ha ka wat kaba ar ba kum ka seng ka dawa na ka sorkar Meghalaya ba kam dei ban shu shim rai klumar ha kane ka kam pynbeit pud pynbeit sam bad ka dei ban ïaid da ka lynti kaba bniah khnang ba ki jaka ki puta jong ka jylla Meghalaya kan nym dei ban leit sha ka jylla Assam.
Kane ka jingmih ka seng RBYF Western Zone ban kren halor ka jingïapynbeit pud pynbeit sam ha kane ka wat kaba ar, ka dei hadien ba dang don ki jaka ba hap ha Western Ri Bhoi kiba hap ban ïa pynbeit ha ka wat kaba ar kiba kynthup ïa ka Borduar bad ka Nongwah Mawtamur ba kim kwah ban jia biang kumba la jia ha ka jingïapynbeit pud ha ka wat kaba nongkong ba la kynnoh ba bun ki jaka ka Meghalaya ka leit sha ka jylla Assam.
Haba ïa kren bad ki Nongthoh Khubor mynta ka sngi ha Nongpoh, u President ka RBYF Western Zone, u Bah Active Pator bad u General Secretary, u Bah Runing Well Syngkli, ki la ong ba kum ka seng ka sngewkhia halor ki kam pynbeit pud pynbeit sam ba kam kwah ba ka sorkar kan shu shim rai klumar halor kane ka kam pynbeit pud bad shuwa ban ïaid shakhmat ka sorkar Meghalaya ka dei ban da tih bniah bha khnang ba ki jaka jong ka jylla Meghalaya kam dei ban leit sha ka jylla Assam.
Kitei ki nongïalam ki la pynpaw ruh da kaba ong kumba la jia ha ka wat kaba nyngkong ha ka jingïapynbeit pud la shuh shim rai tang da kaba ïa rah kti ki paidbah bad khlem da bishar bniah ïa ki kot ki sla bad dei namar kane ka daw bun ki jaka jong ka Meghalaya ka leit noh sha ka jylla Assam.
Da kaba sngewkhia ha ki bynta jong ka Borduar bad ka Hima Nongwah Mawtamur ba dang sah ha ka kam pynbeit pud, ka sorkar kam dei ban shu leh klumar bad dei ban da tih bniah lyngba ki kot ki sla naduh ki raid bad ki hima bad kumjuh ruh wat ki sordar shnong bad ki nongïalam shnong lem bad ki paid Khasi ha kitei ki thain khappud ki kwah hi ban don sha Meghalaya bad ki don ruh ïa ki kot ki sla kiba baing ban pynshisha ba ki dei hapoh ka jylal Meghalaya, ki la ong.
Namar kata, na ka liang ka RBYF ka dawa na ka sorkar ba ha kane ka wat kaba ar jong ka jingïapynbeit pud pynbeit sam kim dei ban shuh ïa shim rai tang da kaba rah kti ne na ka mon jong u paidbah, hynrei dei ban da bishar bniah lyngba ki kot ki sla ha kaba ki Raid bad ki Hima bad ruh naduh ki shnong ki don ïa ki kot ki sla kiba biang khnang ba kitei ki jaka kan nym leit sha ka jylla Assam, ki la bynrap.
Shuh shuh, ha kawei pat ka bynta kumba ka sorkar Assam ha ki bnai ba la let noh hadien ba la dep ban ïa pynbeit pud ha ka wat kaba nyngkong ka la wan ban sieh da ki maw pud ha ki shnong khappud khlem da tip lang na kas sorkar Meghalaya ba ka seng ka la leit ban phut noh bad halor kane bynta ruh ka sorkar Meghalaya kam dei ban ailad ban shu wan sieh klumar ïa ki maw pud maw sam bad dei ban sieh ïa ki maw pud maw sam lyngba ka jingïatip lang jong baroh ar sorkar kumba la ïa pynbeit ha ka jingïapynbiet pud pynbeit sam, ki la bynrap.