Nongstoiñ, Nailar 22: Ha ka shiteng synñia jong ka 22 tarik ha ka por kumba 12:30 ei ei, ki dkhot ka VDP jong ka shnong Diengsyiang kawei na ki shnong kiba ha ka thaiñ Nongkhnum West Khasi Hills District, ki la ïoh ban kem ïa ka kali kaba la pyndonkam da ki nongtuh blang katba ki briew pat ki la lait phet noh.
Ha ka jingïakren lyngba ka phone bad u bah Messiah Ïawlar President ka VDP, u la ong ba ki trai blang ki la ïoh sngew ïa ka jingkyang ki blang, mar mar ki la sngewthuh ba lah dei beit ki myntuh. Kumta ki la mih shabar ban leit kthong ïa ki, hynrei kim lap shuh namar ba ki la pynher sted ïa ka kali.
Hadien pat ki la phone noh bad ïa kiwei ki shnong ba marjan bad dei tad haduh ba la ïoh phone ïa u Sordar shnong Tyngrong Wahladew, ba da ka jingshimkhïa jong u la ïoh ban bad ïa kitei ki nongtuh kiba la don haduh 5 ngut kynthup ïa kawei ka kynthei.
Pynban katba dang pynlong ïa ka jingtohkit kitei ki nongtuh ki la ïoh ka lad ban phet krad noh bad ki la ieh jyndat ïa ka Kali kaba don ïa u rejistar nombar AS 01 H 3163 bad 3 tylli ki Blang kiba la tuh ki dei jong ka kong Bijel Ïawlar.
U bah Ïawlar u la ïathuh ba ïa ka kyrteng jong kitei ki nongtuh ym shym la ïoh satia, hynrei ki samla kiba la kylli ïa ki ki ïathuh ba uwei u kam ïalade ba u dei na Riangdo, uwei pat na Thadwang, uwei na Nongstoiñ, Maw ïonglumsyntiew, katba ïa ka kynthei pat ym shym pat lap kylli namar ka la lap phet noh.
