Dawa ka RBSU sha ka sorkar jylla ban tei noh da ka Jingkieng ba thymmai ha Jingkieng Dwarksuid

Nongpoh, Nailar 03: Ka Ri Bhoi Students Union (RBSU) kum kawei ka seng kaba ju shakri na ka bynta ka bha ka mïat ki paidbah ha Ri Bhoi District ka la mih ban dawa na ka sorkar Jylla ba ka la dei ban pynsted ban tei thymmai noh ïa ka Jingkieng ha Dwarksuid, Umïam ha Ri Bhoi District.
Kum ban pynkynmaw, ka Jingkieng Dwarksuid ha Umïam ka dei kawei ka Jingkieng kaba la synjor bad la sator ba ka la buh jingma ban leit ban wan ki paidbah, ha kaba ka sorkar jylla na ka daw ka jingsynjor katei ka Jingkieng ka la shna mih plie ruh da ka Jingkieng Nar (Bailey Bridge) ban ïaid ki Kali kit khia bad ka daw ka long ba katei ka Jingkieng ka la synjor bad ha ki snem ba la leit noh la mih bun ruh ki jingdawa ban khanglad ban ïaid ki Kali kit khia.
Halor kane ka bynta, na ka liang ka bor synshar District ruh lyngba ka Deputy Commissioner la dep ruh ban pynjari da ka kyndon 144 CrPC ban khanglad ban ïaid ki Kali kit khiah bad dei tang kito kiba ki tang hapoh 10 MT ki lah ban ïaid na katei ka Jingkieng bad kiwei kiba kit tam pud ki hap ban ïaid na ka Jingkieng Nar ba la dang shu dep shna da ka sorkar.
Haba ïa kren bad ki Nongthoh Khubor, u President ka Ri Bhoi Students Union, (RBSU), u samla Everjoy Nongpluh, u la ong ba ka seng ka sngewkhia halor kane ka jingkieng, ka dei namar ba haduh mynta ym pat iohi ïa ki dak ki shin ba ka sorkar kan tei thymmai bad kumba long mynta ki paidbah ki shem jingeh ban ïaid na katei ka jingkieng namar tang shu poi ha katei ka Jingkieng ki kali paidbah ki hap ban ap ïa ka pali tang ban ïaid lyngba na katei ka Jingkieng ba ka daw ka long ba katei ka Jingkieng rim ym lah shuh ban ïaid laitluid ki Kali paidbah.
U la ong ruh ba ka seng ka lap ruh da la ki jong ki khmat ba ki paidbah lane ki kali paidbah kiba ïaid na katei ka Jingkieng tang shu poi ha katei ka Jingkieng ki hap ban ap na shiliang sha shiliang ïa la ka pali ban ïaid na katei ka jingkieng ba ka daw ka long ba ki kali paidbah kim ioh shuh ban ïaid laitluid na ka daw ba katei ka Jingkieng ka la synjor ba buh jingma.
“Wat la ka Jingkieng Nar bad katei ka Jingkieng kaba la don lypa ki don haduh ar tylli, hynrei ki paidbah ki jynjar ban kam ïa katei ka Jingkieng na ka daw ba katei ka Jingkieng rim kam long laitluid shuh ban ïaid ki Kali paidbah” ong u Samla Everjoy Nongpluh, bad bynrap ruh ban suk ki paidbah ha ka leit ka wan bad ban nym buh jingeh ruh ïa ki paidbah ba leit ba wan lyngba katei ka Jingkieng ka sorkar jylla ka la dei ban pynsted noh ban thaw thymmai da ka Jingkieng ba thymmai khnang ba kan pynsuk ïa ki paidbah ne ki Kali paidbah ba leit ba wan lyngba katei ka Jingkieng” u la bynrap.
Namar kata, kum kawei na ka seng kaba peit ïa ka eh ka shon ki paidbah ha Ri Bhoi ka la sngewdei ruh ban dawa na ka sorkar jylla ba ka la dei ban pynsted noh ban tei da ka jingkieng thymmai bad lada ka sorkar ka lah ban tei noh da ka Jingkieng Thymmai kane kan pynsuk ïa ki paidbah ba leit ba wan bad ruh ban nym buh jingma ïa ki paidbah kumba kane ka jingkieng la tip paidbah ba ka la synjor bad ka don hapdeng ka jingma ban ïaid ki Kali kit khia, u la bynrap.