Shillong, ïaïong, 17: Da ki hajar ngut ki paidbah nongshong shnong jong ka rilum Garo ha ka sngi Saitjaiñ ki la mih paidbah ban ïashim bynta ha ka jingïalang dawa jylla Garoland ba la pynlong da ka Garoland State Movement Committee (GSMC) ha Williamnagar, East Garo Hills.
Ka sur kaba mih na kane ka jingïalang ka la dawa ïa ka Sorkar Jylla bad ïa ki MLA ba kin mynjur da ka Resolution hapoh ka Ingdorbar Thawaiñ ka Jylla na ka bynta ban phiah noh ïa ka Meghalaya hapdeng ki ar tylli ki jylla, kata, ka jylla Garoland bad ka Jylla Khasi-Jaiñtia.
U nongïalam jong ka GSMC u Nikman Ch Marak haba kren ha kane ka jingïalang u la ong ba ka jingkyrshan ïa ka jingdawa Garoland na kylleng ki jaka jong ka rilum Garo bad ka jingwan ïashim bynta jong ki Nokma, ki nongïalam shnong, ki Laskar bad ki sengbhalang ka dei ka dak ba ki ai ïa ka jingkyrshan ban phiah noh ïa ka jylla Meghalaya.
U la ong ka por ka ladei ban phiah noh ïa ka Meghalaya ha ki ar bynta, kata, ïa ka jylla Garoland bad ïa ka jylla Khasi-Jaiñtia khnang ba kan nym wanrah ïa kano kano ka jingïasngewpher jingmut hapdeng ki lai tylli ki jaitbynriew ha kiba bun ki bynta.
Ha kane ka sngi, ki paidbah ki la pynlong ruh da ka jingïaid rally ha kylleng ki jaka jong ka sor Williamnagar bad pyrta jam da ka sur ‘ngi dawa Jylla Garoland.”
