Balei ba ka jingbym ïohi jngai jong kiba ha shuwa jong ngi kan ktah ïa ki Samla Khasi bad Jaiñtia jong ka spahsnem kaba 21?

Ka State Reservation Policy (SRP),ba la pynbna da ka sorkar Meghalaya, Personnel Department (N0.PER.222/71/138, Dated Shillong, the 12th January, 1972) bad ka Roster System ba la pynbna lyngba ka Office Memorandum, dated 10th May 2022 (OM) ba la pynshong nongrim na ka rai jong ka Meghalaya High Court (Case no. WP(C) No. 394 of 2021; Date of order: 05.04.2022 in Zanera R. Marak & Ors. vs. State of Meghalaya & Ors.) ka dei ka thma ktien kaba jwat ha kine ki khyndiat sngi ba la dep bad la khmih lynti ba kan nang jur ruh. Katba ka High Court ba donburom ka la leh ïa kaba dei da kaba bthah ban bud ïa ka Roster System katkum ka bhah thungkam ha ki kyrdan bapher bapher kumba ka la don lypa ha ka Sorkar Pdeng bad kiwei pat ki jylla, kam shym la buh tarik pat naduh mynno ba yn lah ban pyntreikam ïa ka. Kumba ka paw, mynshem snem, ka Sorkar Jylla ka la pyrshang ban pyntreikam buit-tuh ïa ka Roster System da kaba ïaid shadien khlem da peit bha ïa ka Clause 2 jong ka State Reservation Policy kaba ong shai ba “Lada jia ba duna ki nongthep ïa ka kam ba la mang kyrpang na ka bynta ki nongthepkam jong ka jylla bad haba kim long kiba bit ne kiba pass na kata ka kyrdan bad u snem, ïa kane ka kam ym lajh ban rah sha kawei pat ka snem. Hadien ba ym lah ban thung hapoh ar snem, lah ban shim ïa kine ki reservation kum kiba la ïap”. Shuh shuh,ha ka juh ka clause ka ong ruh “Hynrei ïa ka jingduna ki nongthep kam na ki Scheduled Tribe bad Scheduled Caste yn rah shakhmat ha kawei pat ka snem thep kam ban dang wan bad yn ïaleh katba lah ha ka ban thep kam ha uta u snem, tangba yn ym lah pat rah shakhmat ïa kata ka jingduna ha ki snem kiba hadien palat ïa ka shi snem.
Hadien ba la kut jong kata ka ar snem, yn ñiew ïakine ki reservation ki bym treikam shuh”. Ka OM dated 10th May 2022 ba la pynmih da ka Gazette of Meghalaya ha u May 26, 2022 ka ong haka ‘Clause D-1- Khnang ban pynkhreh ïa ka Reservation Roster, ka kyrteng jong ki nongthepkam kiba bat ïa ka kamhaduh ka tarik ba la pyntip ïa kane ka O.M. yn sdang shwa da ki nongthep ba nyngkong,naduh ka por ba pyntreikam ïa ka Reservation Policy, katkum ka jingdon ki jingtip, lah ban pyndap ha ka Reservation Roster katkum ka Roster’. Nangta shuh shuh,ka‘Clause B-6’ jong ka OM ka ong ba ‘Hadien jong man la ka por thep kam, dei ban buh jingkheiñ hapoh ka Reservation Roster da kaba kdew shai ba ki dei jong ki Khasi bad Jaiñtia, Garo, kiwei de ki Schedule Tribe bad Schedule Caste bad kumjuh ruh ban buh ka jingkheiñ kaba bniah halor ki kam ki bym pat shym la lah ban pyndap, khnang ban rah sha khmat ha ka ban thep kam ha ki snem ban wan’.
Kane ka OM ka pynpaw shai ba la shna kyrpang da ka jingthmu ban ai jingmyntoi beit tang ïa ka jaitbynriew Garo ban kheiñ ïa ka bhah kam da kaba ñiew na ki snem kiba la dep, khlem da peit bniah ïa ki provision jong ka Clause 2 ka Reservation Policy ba la kdew haneng ha ka por ba shna ïa ka Roster System kaba lah ban pynduh nongïa ki nongwad kam jong ka jaitbynriew U Hynniewtrep (ki Khasi bad Jaiñtia katkum ka State Reservation Policy). Ngam lah ban sngewthuh ba ki nongmihkhmat jong ngi na Khasi, Jaiñtia bad Ri-Bhoi district ki leh aïu ha ka por ba pynmih ïa kane ka OM mynshem snem. Kato ka dei ka por kaba biang eh ban kdew ïa ka jingbakla bad ruh ban dawaba dei ban khmih bniah biang sa shisien ïa ka State Reservation Policy thik kumba ka longha shwa ban tyrwa ïa ka jingpyntreikam ia ka Roster System kaba long pyrshah ïa baroh ka ka rukom treikam.Ka High Court jong ka Meghalaya kabthah tang ïa ka sorkar jylla tang ban pynkhreh ïa ka Roster System khnang ban ithuh ïa ki kam kiba lait katkum ka kynhun ba la bhah khnang ban lait na kino kino ki jingbakla ha kaba pyndap ïa ki post ba thylli bad kumjih ruhki post ki ban sa lait hadien habud. Ha ka jingshisha, High Court badonburom jong ka Meghalaya ka la pynshai bha ha ka rai jong ka kaba la mih ha ka 03.04.2023 ha kaba ka la kyntait ïa ka PIL jong u Greneth M. Sangma pyrshah ïa ka jylla jong ka Meghalaya bad kiwei. Ha kaba ïadei bad ka snem ba pyntreikam ïa ka Roster System khlem da peit ïa ka merit jong ka case bad ban ieh tang ha ka legislature bad ka executive, khamtam ha ka Assembly ba thymmai ban ïatai sani halor kane. Don shibun kiei kiei kiba donkam kren ïa ka jingpynbeit kaba kham kloi.Nyngkong eh, ka OM kaba 10th May 2022ka donkam ïa ka jingkhmih biang ba kyrkieh da ka sorkar jylla.
Lym da pynkylla ïa ka Clause 2 jong ka State Reservation Policy da ka State Assembly, kumno yn lah ban pynkhreh ïa ka roster namar baroh ar ki ïapyrshah kawei ïa kawei pat.
Haba ka State Reservation Policy (SRP) ka ailad ban thep ïa ki kam ba lait da kiwei pat ki kynhun jaitbynriew lada jia ba ymdon ki nongthep kiba biang na kino kino reserved classes ha uno uno u snem bad ïa kata kaba duna yn rah shakhmat tangba tang hapoh shisnem, ka Roster System pat ka ailad ban rah shakhmat ïa kita kiba ym shym la lah ban pyndap khlem da buh pud. Ka jingkylli ka long ba hato ka OM dated 10th May 2022 ka lah mo ban long kham halor ban ïa ki nongrim tynrai jong ka SRP-ïa kaba la kdew ha ka Clause 2? Da lei lei ruh kamlah ban long. Kum kajingbynrap shuh shuh (addendum)ïa ka SRP, ka OM No. PER272/72/5, dtd. 18th Dec., 1972 Clause 2.2 ka ailad ban ‘pynkhleh ïa ka reservation ïa ki post da kaba buh lang ïa ki Garo bad Khasi-Jaiñtia haduh 80% ha ka jaka ka reservation kaba kyrpang kata 40% ïa ki Garos bad 40% ïa ki Khasi-Jaiñtia, ha ka District level. Balei ym lah ban leh kumjuh ha ka State level ruh? Khlem pep, ïa kaRoster System yn sa donkam ruh ha man ki District . Ka OM dated 10th May 2022 ‘Clause F’ ka la shu wanrah biang ïa ka provision jong ka OM No. PER 272/72/5, dtd. 18th Dec., 1972, Clause 2.1 & 2-2 ban pynbiang ïa kine ki jingeh. Nangta shuh shuh, sa kawei pat ka bynrap (addendum)ïa ka SRP-OM No. PER.222/72/163, dtd. 28th May, 1974 ka ailad ban pynbiang ïa ka reservation ba 40% jong ki Garo wat da ki nongthep kam kiba nabar ka jylla Meghalaya. Kumno ka RosterSystem kan pynbeitïa kine ki jingeh?
Kumba ka paw mynta, ki don bun ki jingbakla ha ka State Reservation Policy bad kumjuh ruh ha ki OM kiba bud hadien bad kaba kham paw shai ka dei ha ka Roster System kata ka OM dated 10th May 2022 kaba thmu ban pyntreikam na ka por ba ha shuwa. Ka jingbunbriew ha ki distrik jong ka rilum Khasi, Jaiñtia bad ka them Ri-Bhoi ka long kumba 14 lakh (2011 census) ha kaba katkum ka jingheh ka jaka ka don haduh7 tylli kidistrict bad 36 tylli ki Assembly constituency. Katba,ha rilum Garo pat, ka jingbun briew ka don tang hapoh ka 10 lakh (2011 census), ka jaka ruh ka bym da ïar ha kaba ka kynthup 5 tylli ki district bad 24 tylli ki Assembly constituency. Hynrei, ka SRP pat ka ai bhah 40% reservation ki kam ba lait n aka bynta ki Garo bad 40% reservation pat kyllum lang ïa ki Khasi-Jaintia. Hato kane ka jingleh ka don nongrim?Wat ha u snem 1971, ka jingbun jong ki Khasi-Jaiñtia ka long kumba 45% bad ki Garo kumba 32%, hynrei wat la katta ruh la pyntreikam ïa ka jingthew tarajur kaba noh shilliang tangba la pyntreikam ïaka tang khyndiat por da ka jingdon jong ka Clause 2 jong ka SRP. Tang U Blei hi ba tip ïa ka jingbym banse jong kita kiba hashuwa jong ngi ban kin pdiang ïa kane kaState Reservation Policy ka bym biang, nalor ka jingbym ïoh Myntri Rangbah bad ka jingïoh ïa ka jylla khlem da don u pud u sam ba thiknaha ki khappud bad ka jylla Assam kaba dang ktah ïa ka jylla haduh mynta. Kaba biang sbiak ban kynthoh ka long ka jingbym ïohi jngai jong kiba hashuwa jong ngi. Hynrei balei te ba kane ka jingbymïohi jngai jong kiba hashuwa jongngi kan ktah ïa ka jingim ka jaitbynriew Hynniewtrep jong ka spah snem ba 21? To ngin pyrshang da lade ban ym leh biang ïa kajuh ka jingbakla kaba kiba hashuwa jong ngi ki la leh da kaba kbum jar jar halor ka SRP bad ka Roster System. Ki samla mynta bad ki samla lashai kin tim pap ïa ngi lada ngi ruh ngi kbum jar mynta. Ngi dei ban nud ban kren ïa ka jingshisha. Ka jinglong ba pyrshah kawei ïa kawei pat hapdeng ka State Reservation Policy bad ka Roster System kaba la pyntreikam mynta ka donkam ïa ka jingpynbeit.
Khatduh, lada ka donkam shisha ban phiah ïa ka reservation katkum ki jaitbynriew ha ka jylla, da kaba buh jingmut ïa ki samla Meghalaya jong ka spah snem ba 21bad ki lad ïohkam ha ka sorkar jylla, te to ngin ïaleh ban phiah nohïa ka 80% katkum ka jingbun bad ban pynkhreh ïa ka roster kumba ka dei ban long. Hooid, kane kam sngew don nongrim banthew da ka 40:40 ratio. Ym ju don ki jylla ha India ha kaba ïa ka reservation la phiah katkum ka jingdon ki jaitbynriew, la ka long 3 lane 33 ki jaitbynriew riewlum ba la ithuh. Ka Nagaland, Arunachal Pradesh bad Mizoram baroh ki don ïa ka reservation kaba kynthup lang ïa ki Schedule Tribe baroh lait noh ïa ki jaitbynriew barit paid. Wat ka Manipur ka don 31% ka reservation kaba kynthup lang ïa ki ST baroh. Nga tharai baroh ki nongmihkhmat ba la shah jied na Jaiñtia Hill, Ri-Bhoi bad Khasi Hill khlem da peit ha kano ka party ki don, ki hap ban dawamardor ban pynkylla ïa ka OM dated 10th May 2022 bad ban khmih bniah biang ïa ka SRP. Kumjuh ruh, baroh ki seng jong ki samla pule, ki seng bhalang, ka imlang sahlang,ki riew pawkhmat bad ki paitbah hi baroh ki dei ban klet shuwa ïaki jingïapher bad kin ïasnoh lang kawei ban dawalang halor katei ka mat da kawei ka sur namar kane ka ktah ïa ka ïohkam ïoh ki khun ka jaitbynriew u Hynñiewtrep.
Ka elekshon ka lah kut bad baroh ngi lah shim ïa kaei ba la tyrwa ha ngi. Ka por ka la dei ba ngin ïamir jingmut lang; khamtam halor ka State Reservation Policy kaba don jingïadei ruh bad ka Roster System khnang ka jingsam bhah ha kaba ïadei bad ki kam sorkar ha ka jylla kan long ka bym noh shilliang bad ruh ban ïada ïa ka lawei jong ki khun samla ka ri Khasi-Jaiñtia jong ngi. Ngi dei ban long kiba la khreh ban mih madan na ka bynta ban ïakhih da kaba tyngeh hynrei kaba jai jai khnang ban pynbor ïa kane ka sorkar bamynta ba kan khmih bniah biang ïa ki rai jong ka bad ban pynkhreh lypa ïa kaei ka ban sa bud hadien. Da kawei ka sur , ngi dei ban dawa ban pynlong ïa ka assembly ba kyrpang kumba lah dawa ruh ka party VPP ban ïatai tang halor ka State Reservation Policy bad ka Roster System. Kampher lada ki pyndonkam da kano kano la lad, tangba kano kano ka Reservation Policy bad ka Roster System kam lah ban treikam da kaba phai shadien (retrospective).
Kam dei ba nga long pyrshah ïa ki hynmen bad para Garo. Ma ki bad ki nongïalam jong ki ki ïaleh kumno ban ïada ïa ka jingmyntoi jong ki bad nga kwah ba ki briew jong ngi bad ki nongïalam jong ngi ruh kin ïada kumjuh ïa ka jingmyntoi jong ka jaitbynriew Khasi-Jaiñtia jong ngi ha kajuh ka rukom. Baroh ki policy kiba ka jylla jong ngi ka la pyntreikam kam dei ban long shilliang tang ïa kawei ka jaitbynriew pyrshah ïa kiwei pat bad hynrei ka dei ban long ka bym leh shilliang ïa baroh ki paid Khasi-Jaiñtia jong ka jylla Meghalaya kumjuh. (U nongthoh u dei uba hikai ha NEHU, Shillong).