Dawa ka BJP ïa ka Sorkar ban tuklar noh halor ka jingpynibor hapdeng u VC NEHU bad ka MCTA

Shillong, Nailar 31 : Ka Bharatiya Janata Party (BJP) ka la kyntu ïa ka sorkar jylla ba kan tuklar noh mardor halor ka jingpynibor kaba la neh slem hapdeng u Vice Chancellor ka skulbah NEHU bad ka Meghalaya College Teachers’ Association (MCTA) halor ka jingpyntreikam ïa ka National Education Policy (NEP) 2020.
“Ngi la ïohi ïa ka jingbym ïahap jingmut hapdeng ka MCTA bad ka NEHU haba ïadei bad katei ka ishu. Na bynta ka jingbit jingbiang jong ki samla pule ha Meghalaya, ngin sa phah ka jingthoh sha u Myntri ka tna Pule Puthi ka sorkar jylla ban kyrpad ba un tuklar lang ban pynbeit noh ïa katei ka jingeh lyngba ka jingïakren,” ong u President ka party, Bah Ernest Mawrie.
Da kaba kam ba ka NEP kan ai ka jingmyntoi kaba khraw ïa ki samla pule jong ka jylla, utei u heh BJP u la ong ruh ba ki kubur ba kin don katto katne ki jingthut hangne hangtai nalor ba la slem lypa. “Kumta mano ban duhnong, kidei ki samla pule ka jylla. Haoid, nga mynjur ba ka don ka jingktah ha ka liang ka jinglut jingsep hynrei haba ngi pyntreikam ïa ka NEP, ka sorkar ka dei ban phah ïa ka jingtyrwa ïa ki jingdonkam jong ki sha ka sorkar pdeng.”
Halor ka jingkylli, u Bah Mawrie u la ong ruh ba don ki Principal kiba la pynpaw ba ki pdiang sngewbha ban pyntreikam ïa ka NEP bad don pat na ki kiba pynpaw ba kim pat pynkhreh namar ki don ka jingduna ha ka liang ka jinglut jingsep bad ki jaka pule. “Haba phi sdang thymmai ïa kano kano ka kam, kan don beit ka jingeh kaban mih hynrei hap ban ïaid ryngkat ryngkat bad kumta hap ban thoh sha ka sorkar jylla namar kane ka jingeh lah ban pynbeit tang da ka sorkar jylla bad ka sorkar pdeng,” u la ong.