Shillong, Nailar 31: Da ki spah ngut ki dkhot ka Hynñiewtrep National Movement (HNYM) kynthup ïa u President, u Bah Louis Dohtdong, ki la shah khanglad noh ha ki bor District ha ka jingyur jong ki sha Secretariat ban dawa thaw noh ïa ka Employment Policy ne ka Polisi thungkam na ka bynta ki Samla trai jylla. Ki Magistrate bad ki Pulit ki la pynap shrip noh ha surok Civil Hospital ïa ki dkhot ka HNYM, namar ba ki bor synshar District ki la pynjari da ka Section 144 CrPC naduh hynnin ka miet.
Haba ki dkhot ka HNYM kiba la rah ki lama, ki placard, ki la mut ban tur jubor sha Secretaiat, ki Pulit ruh ki la pyneh triang ban nym shah da lei lei namar ka kyndon 144 CrPC ka la mana lypa ïa ka jingïalum briew ba palat san ngut ha ki rud jong ka Secretariat.
U President ka HNYM, u la ïathuh ba ka jingtur ka Seng sha Secretariat ka long ban leit pynkynmaw ïa u Myntri Rangbah, u Conrad Sangma halor ka jingkular jong ki ba thaw noh ïa ka Employment Policy khnang ba kan long ka jingplie lad plie lynti ïa ki Samla ha ka liang ka jingeh jong ka ïoh kam ïoh jam, hynrei na ka liang ka sorkar ka la shu leh pynklet ïa kane bad kam shym la leh eiei haduh mynta.
Namar ka jingbym iohlad ban tur sha Secretariat, ka Seng ka la pynlong noh da ka jingïalang ba lyngkot hakhmat jong u Mot Kiang Nangbah hajan Civil Hospital, ha kaba u Bah Louis, u la ther tyngeh ïa ka sorkar jong u Conrad Sangma, namar ka jingbym shimkhia ïa ka jingeh ki Samla wadkam wadjam. “Kane ka jingleh pynklet ka sorkar ïa ka Employment Policy, ka pyni ba ka sorkar MDA kam don jingkitkhlieh satia na ka bynta ki samla bym pat ïoh kam ïoh jam”, la ong u nongïalam ka HNYM.
U Bah Louis u la ong ruh ba u Myntri Rangbah ka jylla ha jaka ba un wanrah da ka Employment Policy, u la wanrah pynban da ki Cement Company kiba la wanrah pynban da ki bar jylla kaba la long pynban kum ka jingplie lad ïa ki bar jylla ban wan trei ha kine ki karkhana pynmih dewbilat.
Hadien ba la wai kane ka jingïalang ki dkhot ka HNYM ki la ïaid paidbah noh da ka kjat na Civil Hospital haduh Motphran ryngkat ka jingpyrtad shla artad artad lynti ïa ka sorkar MDA 2.
