Shillong, Nailar, 31: Ka Khun Hynñiewtrep National Awakening Movement (KHNAM) ka la ong ba u MLA jong ka South Shillong Constituency u Bah Shanbor Shullai bad u MLA jong ka Pynthorumkhrah Constituency u Bah AL Hek kim don ïa ka bor ban thung Rangbah Shnong.
“U Bah Shanbor Shullai bad u Bah AL Hek kim don ïa ka bor ban thung Rangbah Shnong, lada ngi peit katkum ki kyndon aiñ ba la don, namarkata ka KHADC ka dei ban pan jingshai na kine ki ar ngut ki MLA halor ka jingai bor jong ki ïa u bar jylla ban long Rangbah Shnong bad ban ai No Objection Certificate (NoC),” ong u Working Presiden ka KHNAM-CEC ha u kyrwoh ba la phah sha ki lad pathai khubor ha ka sngi Palei.
“Lyngba ka jingleit khynra trading License jong ka seng HITO ha ki thain Rynjah ka long kaba sngewlyngoh ban ïohi ba ka KHADC ka ai Trade License ïa ki bar jylla lyngba ka NOC ba la soi da u bar jylla uba la kam ïa lade kum u Rangbah Shnong jong ka RR Colony,” la ong ka KHNAM.
“Katkum ka “The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act 2007” ka la batai shai kdar ba u Rangbah Shnong “ka mut u Khasi u ba la shah jied da ki nongshong shnong jong ka shnong kaba hap hapoh u pud u sam jong ka Hima Mylliem, bad dei tang u khasi uba lah ban long u Rangbah Shnong”. Ka long ka bashai ba u bar jylla um lah ban long Rangbah Shnong katkum kane ka aiñ,” la bynrap u kyrwoh.
“Ngi kwah ban buh jingkylli ïa ka KHADC, halor kano ka nongrim la pdiang ïa ka NOC ba la soi da u bar jylla kum u Rangbah Shnong? Kane ka pynpaw ba ka KHADC hi ka pynkhein ïa ka ain jong ka Hima Mylliem bad la shu ai thurmur ïa ka Trade License lyngba ki NOC ki bym biang tang ban biang mano re mano shimet,” la kynthoh ka KHNAM.
“Na kawei kapor sha kawei pat la lap ïa ka jingshim sting jong ka Council haba ai ïa ki Trade License bad kam don ka jingpyntreikam hok ïa ka Trading by Non-tribal 1954,” ong shuh shuh u kyrwoh.
