Shillong, Nailur 5 : Ka Bharatiya Janata Party (BJP) Meghalaya, ka la dawa ïa ki bor ka aiñ ba kin ai ka jingpynshitom kat kum ki kyndon aiñ pyrshah ïa u dkhot barim jongka u Sanjay Sharma namar ka jingibeiñ ïa ka Bible Bakhuid-ka kot Bakhuid jong ki paid Khristan.
“Ka jingjia kaba sngewsih ba ibeiñ ïa ka Bible Bakhuid kala paw pyrthei dang shen ha ka Jylla jong ngi bad ka BJP Meghalaya ka pangnud ban ïohi ïa kane ka kam kaba la leh da u briew shimet uba kyrteng u Sanjay Sharma” ong u Bah Mariahom H Kharkrang, Nongaiktien ka BJP.
U Bah Kharkrang ula pynshai ruh ba u Sharjay Sharma um shym la bat kam shuh hapoh ka party (BJP) bad u dei uba la ieh noh kam naduh ka 8 tarik Jymmang 2026.
“Ka party ka dang tohkit la u dang long ne em u primary member jong ka party bad, lada hooid, kan leh da kaba tyngeh pyrshah ïa u” ula ong.
Kat kum ka jingong u Bah Kharkrang, ka BJP ka ju ngeit, leh bad ïalap ïa ka nongrim ban “burom ïa ka jingngeit niam ba laitluid jong ki nongshong shnong” (positive secularism) bad ka jinglong briew ba pura.
“Ka jingburom ïa ka jingngeit niam ba laitluid ka dei shibynta jong ka rukom treikam ka BJP, ka lynti kaba la pyni dalade da u Myntri Rangbah Duh ka ka Ri uba ju leit ïashimbynta ha ki mass ha man ka miet Khristmas” ula ong.
U ong ba kum kine ki kam ba la leh khlem ka jingkitkhlieh, ka nang pynjah burom ïa ka party bad pynbudnam ïa u Myntri Rangbah Duh ka ri.
“Ngi kwah ban kren shai ba kum kine ki briew kiba khim ka jingmut jingpyrkhat, kiba don ka jingshun ïa kiwei ki jaidbynriew bad ki niam, kim don jaka ha ka BJP. Ka jingibeiñ ïa ka Bible ka dei ka kam bymman ba shyrkhei kaba syriem kum ka jingpynjulor ïa u mot jong u Swami Vivekananda” ula ong.
