Nongpoh, Jylliew, 23: Kum ka jingkynmaw ïa ka jingïaid lynti ba 60 snem naduh ba la seng ïa ka SOS ha India kata ha u snem 1964 ban peit kyrpang ïa ki khynnah bym don kmie don kpa, ki khynnah baduk bad ki khynnah kiba shah iehnoh beiñ, ka SOS Children’s Village Umïam ha ka sngi u Blei ka la rakhe ba kyrpang ïa kane ka sngi ba la tip kum ka 60th SOS Day ha phyllaw ka SOS Children’s Village Umïam ha Ri Bhoi.
U Bah Paul Lyngdoh, Myntri Sorkar ba dei peit ïa ka tnad Social Welfare u la long kum u kongsan ban ai mynsiem ha kane ka sngi, nalor ka jingdon jong ki bor pynïaid, ki khynnah ba sah ha katei ka jaka bad kumjuh ruh ki kmie ki kpa jong ki khynnah.
Kum ban pynkynmaw, ka SOS Children’s village ha India ka dei ka kynhun trei mon sngewbha bad ka kynhun ba peit kyrpang ïa ki khynnah bym don kmie don kpa, ki khynnah baduk bad ki khynnah ba shah iehnoh beiñ ha ka ri India bad mynta la poi haduh 65,00 ki khynnah kiba peit ba sumar da ka SSO ha ki 31 tylli ki SOS Children’s Village bad kumba 27 tylli ki Community Project kiba la pyntreikam ha baroh ki bynta ka ri India.
Ha kane ka sngi ba ka SOS Children’s Village Umïam ka la rakhe ïa kane ka sngi kyrpang ba la tip kum ka SOS Day la pynphuh pynphieng ruh da ki jingrwai bad ki jingshad kitei ki heprit kiba sah ha katei ka jaka bad ka la long ruh ka jingai mynsiem ïa kiba bun balang ha kaba kum ki heprit ki ïoh mynsiem bad ki lah ban pynpaw pyrthei ïa ki sap ki phong ba ki don ha ka jingim.
Haba kren ha kane ka sngi kum u kongsan, u Bah Paul Lyngdoh, u la pynpaw ïa ka jingkmen kaba khraw ban ïoh ban don bynta ha kabe rakhe ïa kane ka SOS day ryngkat ki heprit ha SOS Children’s village Umïam bad kane ka long shi bynta ban ai burom ïa kata ka jingïaid lynti kaba 60 snem ba ïa ka SOS la sdang nyngkong hapoh ka ri India kata naduh u snem 1964.
U la ïathuh ruh ba sngew long nongwei shuh ha kane ka jaka, namar ha u snem 2004 u la wan ban iuh kjat ha katei ka SOS Children’s Villaeg ha Umïam, ha kaba ki khynnah kim pat don kumba long mynta bad ka long pat ka jingsngewkmen ba ha ka jingïaid lynti kaba la dap 30 snem naduh ba u la wan ban iuh kjat ka la don ka jingkylla bad bun ki khynnah ki la ïoh ïa kata ka jaka ban ïoh ïa ka jingsumar wat la kim don ki kmie ki kpa ne kiba la shah iehnoh bein ha kiba haing ha sem.
U la ai ruh ka jingïaroh ïa ki bor pynïaid ka SOS Children’s village Umïam, ha kaba dei lyngba ka jingtrei shitom bad ka jinglen lade jongki, ka la pynlong ïa kane ka jaka kum ka shlem ban dkup ïa kiba khynnah baduk ba kyrduh bad kiba la shah iehnoh bein ha ka imlang ka sahlang.
Shuh shuh u la pynpaw ruh ba kane ka jingjop ban ai ka jingsumar ïa ki khynnah kiba duk ba kyrduh bad kiba la shah iehnoh bein na ka imlang ka sahlang ka dei ka jingdon ryngkat u nongbuh nongthaw, ha kaba ka burom ka leit sha kito kiba la don bynta ha kaba sdang ïa kane ka jingshakri kaba la sdang nynkong na Austria. U la phah ruh ka khubor jong ka jingkyrmen da kaba kyrpad ba ngim dei ban duh jingkyrmen ne sangeh ïa kine ki kam ba bha ba ngi shakri bad a la ai mynsiem ruh ïa ki khynnah ba kim dei ban duh mynsiem ne ba ki shah iehnoh beiñ ba ki dei ban ïaid shaphrang ha ka jingim khnang ba kin poi sha ka thong ka jong jong ka jingjop ha ka jingim, u la bynrap.
