Dang sahteng sa kumba 50-60 km ban ker sainar shiah ha khappud Meghalaya-Bangladesh

0

Shillong, K Lyngkot 16 : Ka sorkar jylla ka dang pyrshang biang mynta khnang ba kan ïoh ban pynbeit noh ïa ka jingeh ban ïoh shim jaka na ka bynta ban ker pyndep noh ïa ka jingker sainar shiah ha shi lynter ka khappud jongka Meghalaya bad Bangladesh lyngba ka khappud India- Bangladesh.
Na ka liang u Myntri Rangbah haba kren bad ki lad pathai khubor u la ïathuh ba ka don kumba 50-60 KM na ka lynter kaba 443 KM u pud u sam jong ka India – Bangladesh ba don ha Meghalaya ka dang sah khlem pat ker sainar shiah na ka daw ka jingpyrshah na ki nongshong shnong.
“Ki paidbah ha kine ki jaka ki la pynpaw ïa la ka jong ka nongrim. Kumta ka long kaba eh bha ïa ka jylla naba ka rukom bat khyndew ka ïapher kumta kam long ruh kaba dei ïangi ban shu leh da ka bor bad kumta ngi hap ban shim shwa ïa ka jingsngew jong ki paidbah,” u la ong.
Nalorkata, u la ong ruh ba ka rukom treikam jong ka sorkar ka long beit ban jan bad ki paidbah bad kumta ka lah ban don ki khep ba ka lah ruh ban don ka jingthut hangne hangtai. “Hynrei ha kiba bun ki kam, ngi shim shwa ïa ka jingsngew jong ki paidbah. Kumta kumba long ha kane ka bynta ruh ngi kwah ban shim shwa ïa ka jingsngew jong ki paidbah bad ïoh ïa ka jingmynjur jong ki,” u la bynrap biang.
U Conrad u la ong ruh ba ka thong jong ka sorkar jylla ka long ban trei da ka jingsngewthuh lang bad ki kumjuh bad ka tnad Kampohiing ka jylla ïa kaba ki leh haduh mynta hynrei haba ïadei bad kane ka jingker sainar shiah ka kam ka dang shem jingeh. “Kadei ka bynta kaba ngi sngewkhia bha bad ngi la pyrshang lut ki lad bad khlem pep ngi khmih lynti ba ka lad kan sa plie,” u la ong.

Leave A Reply

Your email address will not be published.