Nongstoiñ, Jylliew 23: Ka West Khasi Hills District ka dei ka District kaba khambun hi ki dei ki shnong nongkyndong. Don ruh bun bah ki shnong kiba wat tang ka surok kali ruh kim pat ïoh. Ha kiba kum kitei ki shnong ki dang don bun ruh ki ïing kiba dang shu sop da u phlang najrong tnum bad baroh sawdong jong ka ïing.
La lap ruh ba don napdeng ki ïing ba dang sop phlang ki dei ki ïing thymmai kiba dang shu sdang mih ïing. Haba kylli ïa ki balei ba ki shu sop da u phlang, don kiba ong ban shna da ki ïing kiba bha ne da ki ïing dieng kam long kaba suk, namar ban thied dieng shna ïing na ki karkhana ruh ka dor ka rem haduh katta katta. Nalorkata, ki la ong ruh ba na ka liang ki kmie ki kpa ruh ki ju ong ba haba sdang ban mih ïing, ym dei ban shna ïing bha hynrei dei ban shna shuwa da ka ïing phlang.
Ki don katto katne ki longïing kiba ong ba ki dang ap ban ïoh jingïarap na ka Block lyngba ka skhim IAY, ba ki rangbah shnong ki la dep phah ïa ki kyrteng jong ki bad ki kyrmen ruh ba kin sa ïoh ïa katei ka jingïarap bad ban shna da ka ïing kaba kham bha.
Halor ka jingbym don surok kali, ki la ong ba wat la ka sorkar lyngba ka PWD kam pat lah ban pynpoi surok ruh kim da sngewkhia than, namar ba ka la don lypa ka skhim shi spah sngi (MNREGS), kaba ju mang pisa na ka bynta ki surok shnong bad lada katei ka skhim ka ïaid bha bad ki nongpynïaid jong ki Village Employment Council (VEC), ki trei shitom bad pyntreikam hok ïa ka pisa ba la mang na ka bynta ki surok shnong, ki kyrmen ba ka leit ka wan kan ym shitom shuh kumba mynshuwa.
Katto katne ki nongshong shnong ha kitei ki nongkyndong pat ki la ong ba ka jingpyntrei surok lyngba ka skhim shispah sngi, ka long shisha ka jingkyrkhu ïa ki paitbah. Hynrei kaba shem jingeh ka long ba kitei ki surok kim shan slem lada don ki kali heh kum ki trok kit dieng bad ki trok kit rnga, kiba ïaid ha ka por lyiur kitei ki surok kim lah shan bad ki sniew kloi kat haduh ba wat ki briew ruh ki shem shitom ban ïaid namar ka surok ka la dap satang da ki thliew ki syar bad ka ktieh.
Ki la ong ba lada ki nongpynïaid ïa ki VEC ha ki nongkyndong bapher bapher ki sngewthuh ba ki paidbah ki shem jingeh ha ka leit ka wan, lada ki surok shispah sngi ki sniew ki la dei ban ym shah ïa ki kali heh ban ïaid ha ka por lyiur. Namar lada ïaid tang ki kali rit ki paidbah ki dang lah ban maramot, hynrei ha ka jingïaid jong ki kali heh kiba khia te ki paidbah kim lah satia ban maramot ne pynbha.
