Dang dait thah ka ïew Khristmas, khmih lynti ki nongïew ban shit ha ki sngi ban wan

Shillong, Nohprah 12: Ka lyer Khristmas ka la sdang ban beh bad ki da ki shin kiba nyngkong eh ban ithuh ïa ka jingsdang shongshit ki briew ïa ka jingwan ka Khristmas lah ban ithuh na ki ïew ki hat.
Ñiuma ka Khristmas kam da dei eh kata ka jingïadie ïathied, hynrei ha kiba bun hi kadei ka aïom jong ka jingai sngewbha bad ka jingpynitynnad ïa ki ïing ki sem bad ka jingpynitynnad ïalade ha ka riam ka beit namart kadei ak por jong ka jingkmen.
Hynrei haba u nongai khubor u la shang kylleng kylleng ki jaka kiba ju die bha ïa ki jingpynriam pynbeit Khrismas kiba bun ki la ïathuh ba kumba long mynta hi ka dang dait thah bad ki briew kim pat ïa beh than sha jingïawan thied wan pet.
“Ki la don hi kiba wan thied ïa ki jingpynitynnad ia ki ïing ki sem kum ki decoration, naduh ki lihts, ki jingbuhmai bad kiwei kiwei, hynrei kim pat da bun kumba long ha kiwei ki snem”, la ong iwei i Kong ba die ia ki tiar decoration ha Khyndailad.
Ki don kiwei pat ki dukan kiba die ïa ki Christmas Tree, nangta ki syntiew soh Khristmas ba ju kheit na khlaw, ki la ïathuh ba kine ki tarik ki paidbah kim pat ju kham wan, hynrei ki wan ha kito ki khat tarik lane ynda ladep ioh result ki khun. Ki don ruh kiba wan thied jaiñ thied nep na ka bynta ki khun, ki hymmen ki para bad kumjuh ruh ban thied ban ïoh ai sngewbha ïa kiba haïing hasem bad ïa ki paralok.
Tangba ka sur jong kiba bun hi kumba lah ban ïoh sngew na kaei kaba la ïakren ka long ba ka ïew ka hat ka dang dait thah sam sam bad kam pat shongshit kumba ju long ha ki por ba jan ka Khristmas ne shi taïew ne shiphew sngi shuwa ban wan ka Khristmas.