Pynhap pyrda ka Seng Kynthei Jaïaw Langsning ïa ka jingrakhe Jubili Ksiar

Shillong, Nohprah 12 : Ka Seng Kynthei Jaïaw Langsning ha ka sngi Ba-ar ka la pynhap pyrda ïa ka jingrakhe ïa ka Jubili Ksiar lane ka jingdap 50 snem ka jingshakri jong ka Seng Kynthei ha ka imlang sahlang bad ha shnong ha thaw.
Ïa kane ka jingrakhe la sdang naduh u snem ba la dep bad ha kine ki shisnem ka Seng Kynthei ka la pynlong bun bha ki prokram, ki jingïakob hapoh ka shnong kyrpang na bynta ki longkmie, ki samla bad na bynta ki heprit ha kaba ïa ki khusnam sha ki nongjop la sam ha kane ka sngi.
Na ka liang u Kongsan, Bah Paul Lyngdoh ba dei ruh u MLA ka thaiñ u la ai ka jingïaroh ïa ka jinglah jong ka Seng Kynthei ban ïai bteng ïa ka jingshakri jong ki ïa ka imlang sahlang ha ka jingïaid lynti jongki naduh ki snem 1971-72 tad haduh ban da kynjoh 50 snem.
U Kongsan u la wer lang ruh ïa ka Seng Kynthei bad ïa ki bor shnong jong ka Jaïaw Langsning ban ïatrei lang wat na ka bynta ban rat dyngkhong ïa u drok khamtam eh ban pynsngewthuh bad pynshai ïa ki khun samla ba kin ym ngop ha ki shangkhawiah jong u.
Ngi kwah ba phin long kum ka kti kamon kti kadiang ha ka jingïakhun pyrshah ïa u drok. Kane kam dei shuh ka kam kaba ngin kheiñ sting namar ka la rung lut wat ha ki kyndong kynshrot bad wat sha ki nongkyndong ruh,” ong u Myntri.
Shuh shuh u la ong ka Seng Kynthei Jaïaw-Langsning kala trei shibun ki kam naka bynta ka bha ka miat ki para nong shong shnong.
U Bah Paul ula ong ba ka shnong Jaïaw-Langsning kala kiew bha haduh katne namar ka jingïalam lynti ki riew rangbah bad ki longkmie kiba long ki nongsain dur ban kyntiew ïala ki nong shong shnong.
Ula ïathuh ba ka Jaïaw-Langsning kadei ka shnong kaba rit kaba don tang 7 tylli ki Block hynrei kadei ka shnong kaba la ïohi jngai.
“Ka jingkhlaiñ ka Jaidbynriew ka dei ka ïa tip lem para nong shong shnong bad lah ban ong ba ïa kane la lamkhmat da ka Jaïaw-Langsning” la ong u Bah Paul.
Na ka liang u Bah Banteidor Lyngdoh, MLA ka Mawkynrew bad kum u trai shnong haba kren kum uwei pat u Kongsan u la ong ba ki kam ba ka Seng Kynthei ka leh ki dei kiba radbah namar ki kam ba ki leh kidei beit na bynta ka bha ka miat bad ka imlang sahlang.
La donlang ruh ha kane ka sngi naduh i Kong B Kostimai Jyrwa kum ka Symbud Kongsan nalor ki nongïalam shnong bad ki nongïalam na ka Lympung ki Seng Kynthei.
Ha kane ka sngi u Bah Paul u la kular ban ïarap shi lak tyngka sha ka Seng Kynthei ha kaba mar shiteng u la aiti ha katei ka sngi. Kumjuh u Bah Banteidor ruh u la kular ban ïarap lang shi lak tyngka na bynta ka jinglut jingsep jong ki ha ka jingpynkhreh ïa katei ka jingrakhe.
Ha kane ka sngi ki Kongsan bad i Symbud Kongsan ki la pyllait ruh ïa ka thup sah kynmaw jong ka seng bad la pynkut pat da ka jingpynhap noh ïa ka lama jubili.