Dang bun ki kali kiba dang pynïeng halor ka jingkieng ha wah Lukha wat hapdeng ka jingmaham kaba jur

Khliehriat naitung 24: Watla ki bor district jong ka East Jaiñtia Hills District, ki la pynbna ïa ka jingpynjari îa ki kyndon aiñ 144 CrPC ba ym bit ban pynieng kali halor ki jingkieng ha ka thaiñ Sonapyrdi hynrei ki thymmei khubor ki ïathuh ba ki dang don beit ki kali kiba dang pynieng halor ki jingkieng khamtam halor ka jingkieng ha ka wah Lukha bad kane ka jia khamtam ha ki por ba don ka jingdheng kali ha ka thaiñ.
Ki thymmei khubor ki ïathuh ruh ba watla ka la don ka signboard kaba la buh ha ka jingkieng ha ka wah Lukha, hynrei ym don pat wat tang uwei u pulit ruh u ban ieng ban ap pahara ha katei ka jingieng, ka jingbym don ki pulit ha katei ka jaka ka pynlong ïa ki nongñiah kali khamtam kiba ñiah ïa ki kali heh ba kit jingkit ba kin pynieng ïa ki kali halor ka jingkieng ha ka wah Lukha.
Kane ka jingpynieng ïa ki kali heh ka lah ban warah ïa ka jingjulor ka jingkieng bad lada katei ka jingieng kan pra ne julor kan buh jingeh ïa ki paidbah ka thaiñ bad ïa ka jylla Meghalaya hi baroh kawei, namar ka dei tang katei ka jingieng kaba pyniasoh ïa ka jylla Meghalaya bad kiwei kiwei pat ki jylla kiba mar jan kiba don ha ka thaiñ shatei lam mih ngi, kumjuh ruh dei na kane ka lynti hi ba ki kali kiba kit jingkit ki ïaid lyngba man la ka sngi ban pynpoi ïa ki mar ki mata kynthupnki mar bam shapoh ka jylla bad kumjuh ruh lyngba kane ka jingkieng la ju phah ïa ki mar sha kiwei pat ki jylla, kane ka jingkieng ha ka wah Lukha ka dei ruh kaba hap hapoh ka national highway 6 ha East Jaiñtia Hills District.
Na ka liang ki paidbah jong ka thaiñ Sonapyrdi ruh ki la pynpaw ka jingsngew khia halor ka jingpynieng kali halor katei ka jingkieng khamtam ki kali heh kiba kit ïa ki jingkit kiba khia, namar ki kwah ban katei ka jingkieng kan neh bad katei ka jingieng ka dei ruh ka jaka kaba ki briew kiba na jan bad na jngai khamtam ki nong jngohkai pyrthei ki ju sngewtynnad ban ieng peitkai nalor ka jingkieng.
Ka daw ka long ba namar nalor kane ka jingkieng lah ban iohi shynna bha ïa ka wah Lukha bad lah ruh ban iohi ïa ka khlaw ba rben ba ju tip kum ka Narpuh Wildlife Sanctuary, ki paidbah ki la pynpaw ba lada ki kali ki ieng (parking) ha katei ka jaka kan buh jingma ïa ka tei ka jingkieng kaba itynnad kaba pyn phuh pyn phieng ïa ka thaiñ.