Shillong, Risaw 12: Ka jingïakhih jong ki nonghikai SSA ha ka jingïalam jong ka seng All Meghalaya SSA Teachers Association (AMSSATA) ki dang bteng ïa ka jingïakhih ka jong ki ha Madan Malki ban dawa na ka sorkar ban pynkiew 100% ïa ka tulop jong ki kaba khlem pynkiew mynta la phra snem.
Kane ka kynhun ki nonghikai SSA ki la buh da ka jingthoh sha ka sorkar ba kan pynkiew ïa ka tulop jong ki shwa ka 30/Nailur/2024, hynrei na ka liang jong ka sorkar kam shym la ai ka jubab kaba shai, dei halor kane ka nongrim ki la sdang ïa ka jingïakhih ha Madan Malki kaba la kot mynta sha ka 12 sngi.
Kine ki nonghikai ki la phah ïa ka jingthoh sha u Lat ka jylla ba un tuklar lem ïa kane ka kam jong ki bad ki la ïakynduh ruh ïa u Bah Paul Lyngdoh u Myntri ka Cabinet ha kaba la kular ban rah ïa kane ka jingdawa jong ki sha u Myntri ka tnad pule.
Na ka liang ki nonghikai SSA kiba don ha ka lama jong ka AMSSATA ki kwah ban ka sorkar kan ai da ka jingthoh sha ki ha kaba ïadei bad kane ka jingdawa ka jong ki lada ka don kano kano ka jingkular hynrei kin nym pdiang lada ka jingkular kan long tang da ka ktien.
