Shillong, Risaw 12: U MLA jong ka Voice of the People Party (VPP) na Mawryngkneng constituency u Bah Heaving Stone Kharpran ha ka sngi Saitjaiñ u la sam paidbah ïa ka MLA scheme kaba dei jong u snem 2023-2024 kaba la kot sha 2.78 klur tyngka.
Ïa katei ka scheme u la sam paidbah ha ka shnong Mawlynrei ha kaba la donlang ki nongkitkam jong ka party bad paidbah kiba ïoh jingmyntoi lyngba ka MLA scheme 2023-2024.
Haba lum kyllum lang ïa ka Scheme kaba une u MLA u la sam sha ki paitbah jong ka Constituency ka la poi sha ka 2.78 klur tyngka kaba kynthup ïa ka Special Rural Works Programme (SRWP) T 2.50 klur, ka Development of Traditional Folk Music (DTFM) T. 2.5 lak, Intensive Sports and Youth Development Programme (ISYDP) T. 2.5 lak, ka Intensive Arts and Culture Development Program (IACDP) T. 2.5 lak, ka Chief Ministers Special Rural Development Fund (CMSRDF) T. 10 lak bad ka Discretionary Grant (DG) T. 10 lak.
U MLA u la pyllait paidbah ruh ïa ka Ambulance lyngba ka CMSRDF Scheme, ka ban ai jingshakri ïa ki paidbah jong ka constituency ha ka por ba ki shem ka pang ha kano kano ka por, khamtam kiba duna ka ïoh ka kot.
U MLA u la pynkup burom ruh ïa ki khynnah ïalehkai Boxing kiba la wanrah nam bad burom ïa ka constituency baroh kawei.
Haba kren na ka liang u MLA jong ka Mawryngkneng constituency u la ai ka burom ïa u Myntri Rangbah barim jong ka jylla u late BB Lyngdoh, namar dei lyngba jong u, la ïoh ïa ka MLA scheme ka ban long ka jingmyntoi ïa ki MLA ban wanrah ïa ka scheme sha ki paidbah khamtam ki MLA kiba don ha ka liang pyrshah.
