Dang ap ka BJP ïa ka jingbthah na Delhi halor u kyrtong ban ïakhun ïa ka elekshon shiteng samoi

Shillong, Naitung 21: Ka jingïakhun ban ioh ïa ka tiket na ka BJP ban ïakhun ïa ka elekshon shiteng samoi jong ka Shillong Parliamentary ka dang khluid bha, ha kaba palat khyndai ngut ki ba kwah ban ïakhun ki la thep ïa ki aplikeshon sha state unit.
U nongthaw aiñ ka Pynthorumkhrah uba dei ruh u nongïalam ba rangbah jong ka BJP u bah AL Hek u la ong ha ka sngi Ba-ar ba baroh ki aplikeshon la phah sha ki nongïalam ka party da u state party president jong ka jylla.
Hynrei u Bah Hek u la ai ksai ba ka rai ka lah ban shim por namar ba ki nongialam na Delhi ki dang bunkam ha ka jingpynbeit thymmai hapoh jong ka seng.
“Ïa ki national office bearers bad ki executives ki dang hap ban ai ïa ka rai ba khatduh.Ki don shibun ki kam kiba kyrkieh, kin sa rai ïa ka ha nongbah Shillong ha ka por kaba biang”, u la ong haba ïakren bad ki nongthoh khubor.
Mynta ka seng ka dang ap ïa ka jingbthah na Delhi halor u kyrtong ban ïakhun ïa ka election shiteng samoi ka ban wan.