Mynta ka sngi 4 ngut yn leit ki nongïalam Congress Meghalaya ban kyrshan ïa kiba ïakhih ha Jantar Mantar

Shillong, Naitung 21: Ki nongïalam ka Meghalaya Pradesh Youth Congress (MPYC) ki la ïathuh ruh ba ha ka 22 tarik mynta u bnai kumba 4 ngut na ki dkhot jong ka, kin leit hiar sha Jantar Mantar, New Delhi ban ïakynduh ïa ki nongïalam jong ka Congress High Command ban pynsngew ha ki ba ym tang ha ki jylla ba heh jong ka ri ba hiar ka pule puthi, hynrei kin ïathuh ruh ba wat ha Meghalaya ka pule puthi ka la hiar bha.
Nangta ki la pyntip ba hadien kane ka jingïakynduh bad ki nongïalam ka Congress kin sa leit ban ïadon ryngkat lang bad ki samla kiba ïakhih ha Jantar Mantar ban leit ai mynsiem, ban ïadonlang bad ki ha kum kane ka jingjia kaba la leh da ka sorkar BJP ban thom da ka bor ïa kiba ïakhih na ka daw ka jinglait tuh ka paper NEET ha ka ri baroh kawei ha kaba da ki lak ngut ki samla ki la shah ktah na kane ka jinglait tuh ka paper bad kumjuh ruh da ki hajar ngut kiba ïakhih kiba la shah bom shah tied ki la mynsaw.
Kine ki 4 ngut ki nongïalam ka Congress ki ban leit sha Delhi kin long U Bah Manuel Badwar, Bah Fredy Thabah, ka Kong Sara Lyngkhoi bad u Bah Banphira Basaiawmoit.
Ha ka jingïakren bad ki lad pathai khubor ha ka sngi Baar ha Shillong ha ophis treikam ka Congress, ki la ong ba ka jinglong ka BJP kaba synshar ïa ka ri ka don ïa ka jinglong ban thom beit da ka bor ïa kino kino kiba ïakhih pyrshah, hynrei katkum ka Article 19 ka riti synshar ka ri, lah ban pynlong ki jingïakhih.
“Ym lah ban khang ïa kino kino ki jingïakhih hapoh ka ri khamtam hapoh ka ri synshar paidbah naba ngi lah ban pynsngew paidbah ïa kino kino ki jingeh ki bym ïaid beit ïaid ryntih, hynrei lada ka long ha kane ka rukom ba da ki hajar ngut ki samla pule ki la shah bom shah tied ka pyni ba ka jingsynshar paidbah ha ka ri ka la kut,” ong ka Congress.
Shuh shuh ki nongïalam ka Congress ki la ïathuh ba kine ki samla ki la pynlut ïa ki por jong ki ban pynkhreh ïakhun ïa ka eksam NEET hapoh ka ri bad ki kmie ki kpa ki jaw la ka umsyep ban kyrshan ïa ki khun samla na baroh ki liang ba kin pass ïa kane ka eksam kaba long ka eksam kaba kongsan bha na ka bynta ka ri.
“Ki la don ruh ki samla na ka daw ka jingduh jingkyrmen ba ki la hap ban shim noh ïa la ki jong ki jingim tang na ka daw ka jingbym lah jong ka tnat Pule puthi ka ri ban pynïaid beit pynïaid ryntih ïa kane ka eksam kaba kongsan tam ha ka ri,” ong ka Congress.