Shillong, Ïaiong 04 : Ka kynhun ïalehkai jong ka Tura District Cricket Association ka la ïoh ban khur ïa ka jingjop kaba tang da 9 ron ha ka kylla kaba nyngkong pyrshah ïa ka Shillong Cricket Association – A, ha ka sngi nyngkong jong ka final U-15 Inter District Cricket Tournament 2023 kaba long ha Umbuda, Ri Bhoi District. La sakhi ba ka jingïakhun ha katei ka sngi hapdeng ki ar tylli ki kynhun ba khlainbor tam ha ka kriket ha ka jylla ïa ka jingtbit jong ki nongkawang bol kiba la lah ban pynkhyllem haduh 23 wiket.
Haba tied nyngkong, ka SCA-A ka la ïoh ban kamai 101 ron katba ka Tura DCA ka la ïoh ban tam da khyndai run hadien ba ki la khyllem lut ki rangtied ha ka por ba ki ïoh kamai 110 ron. Ha ka kylla kaba ar pat, ka SCA-A ka la ïoh ban kamai 46 ron la 3wiket kaba la pynlong ïa ki ban ïoh lamkhmat da ki 37 ron.
Ha kane ka sngi tang lai ngut ki rangtied jong ka Shillong CA kiba la poi dap phew ka jingïoh kamai ron, kitei ki kynthup ïa u Dipayan Nandi da ki 48 ron na ki 47 bol, nangta u Advay Ratan 21 ron bad u Rudra Singh Rathor da ki 16 ron.
