Shillong, Ïaïong 24: Da ki spah ngut ki paidbah ki la tuid sha ka jingïalang ba la khot da ka Seng VPP ha Mawkynrew na ka bynta ban pynrung dkhot sha ka Seng bad kumjuh ruh ban pynshai ïa ki nongrim jong ka Party.
Ha kane ka jingïalang da ki spah ngut ki paidbah shynrang bad kynthei ki la pynïasoh sha ka Party da kaba pyndap ïa ki form ba pynpaw ïa ka jingrung dkhot jong ki sha ka Party.
Haba kren ha kane ka jingïalang, u la pynshai ïa ki nongrim jong ka Party da kaba pynkynmaw ruh ïa ki paidbah ïa ka Vision Statement jong ka VPP, kaba ong Revive ban pynkhie im pat, Restore ban pynïoh pat bad Transform ban pynkylla ne pynbha pat.
U Bah Ardent u la ong ruh ba tang ha kine ki ar bnai duna ba ka VPP kala jop 4 ngut ki MLA, hynrei namar ka jinglah jong ki ban rah ïa ki mat kiba donkam ha ka dorbar mang tyngka kaba dang shu dep, bad ka jingshim jong ki ïa ka mat jong ka Reservation Policy bad ka Roster System, ka la nang ïoh jingkyrshan na ki paidbah na kylleng kylleng ki jaka.
Dei namar kane ka daw ba ka Seng ka la rai ban pynlong ïa ki jingïalang kiba kum kine, khamtam eh ha ki jaka bym pat don ka Seng VPP.
U la ïathuh ba ka Seng ka la dep ban pynlong ïa ka jingïakhih ha ka bynta kaba nyngkong ha kaba ïadei bad ka Reservation Policy bad ka Roster System da kaba pynlong ïa ka jingïalang paidbah ha Mawlai, Jowai bad Jowai. U la ong ba mynta ka VPP ka dang ap ïa ka jingong ka sorkar ba kan pynlong ïa ka jingïalang halor kine ki artylli ki mat. Hynrei ha kajuh ka por ka Seng ka la pynkhreh lypa ban pynlong da ki jingïakhih kiba tyngeh lada jia ba ka sorkar ka shim ïa ka rai ka bym ïahap katkum ka jingangnud jong u paidbah.
