Shillong, Risaw, 20: Ka kynhun shipai BSF jong ka 181 Battalion kiba ap pahara ha khappud jong ka South Garo Hills District bad ka ri Bangladesh, ha ka sngi Saitjaiñ ki la ai sngewbha da ki saikil na ka skhim Civic Action Programme sha ki khynnah skul kiba pule ha ki skul kiba don hapoh kane ka District.
Ïa ki saikil la aiti sha ki khynnah skul da u Commandant jong ka kynhun BSF 181 Battalion u Mayank Dwivedi jong ka Dipulipara Post ha South Garo Hills. Ki saikil ba la sam ha kane ka sngi ki long 35 tylli.
Ki khynnah skul kiba la shah jied ban ïoh ïa ki saikil ki long na ka shnong Dumnikura, Namchapara, Sibbari, Bangankona, Nilwagiri.
Na ka liang jong ki Rangbah Shnong ki la ai khublei ïa ki shipai BSF kiba la kloi ban ai ka jingkyrshan sha ki khynnah skul da ki saikil khnang ba kin dup ïoh lad ban pyndonkam ban poi kham kloi manla ka sngi sha ki skul pule.
