Nongstoiñ, Jymmang 22: Ki paidbah nongshong shnong ka West Khasi Hills ki dei kiba im ha ka rep ka riang bad haduh kine ki sngi palat 70% na ki baroh ki dang bud ïa ka rukom rep kaba la ïalam da ki longshuwa.
Hynrei naduh ba la lap ïa ka rukom rep kaba thymmai kaba katkum kane ka juk kaba mynta, ka la long kaba kham suk ïa u bun balang bad ka la long kawei na ki lad kamai kaba lah ban pynmih da ki lak tyngka ha ka shi snem, khlem da donkam ban da trei shitom eh. Ka la long ruh ka jingmyntoi kaba khraw khamtam ïa ki riew tymmen kiba la kham noh ka karta bad ki bym lah shuh ban dang bteng ïa ki jingtrei bor met.
Haba ïadei bad kane ka phang na ka liang jong u nongthoh khubor, haba ïakren ïa u bah Pranding Kharsyiemlieh bad ka kong Elis Lyngdoh Tongkhar, kiba dei ki shi kurim, ki la ong ba ka kam rep kam dei kaba suk khlem da trei shitom ban minot thop ban ban ïaineh da kaba pyrshang da ki ba bun ki lad ki lynti.
Pynban haba ryngkat ka jingïatreilang bad ki ophisar sorkar kiba peit ïa ka tnad rep bad ki riew shemphang kiba la pyntbit ha ka kam rep, ka ai jingmyntoi ïa ki nongrep bad ka la kylla long kaba kham suk ha kane ka juk thymmai.
Kitei ki shi kurim ki dei kiba shong ba sah ha ka shnong Siejlieh, kawei na ki shnong ha ka thaiñ Nongstoiñ West Khasi Hills District bad ki im ja kpoh da ki kam rep. Hynrei hadien ba ki la nang ïa ka rukom rep tit kaba katkum kane ka juk kaba mynta, ki la sdang ban nang kiew ha ka kamai kajih bad la ong ba ki la lah bam kamai kumba 70-80 hajar shi snem, lada kham biang bad pahuh jaka da ki lak tyngka lah ban ïoh kamai.
Haba batai kham bniah ha kaba ïadei bad ka rukom rep tit, la ong ba haba rep ïa u tit kaba nyngkong ka long ban shna ïa ka ïing kaba sop bha da u phlang. Namar ba lada sop da ka tin ha ka por ba shit ka sngi hapoh ïing ka shong syaid bad ka kjit noh ïa ka jingsngem jong ki song skum kba kiba la teh pyllun pyllun ban thung ïa u symbai tit.
Nalor kata naduh ka por ba la thung ïa u symbai, ka shim por tang kumba saw sngi ba ki tit kin mih bad kin san bha bad hadien ba la sdang ban kheit ha ka sien ba nyngkong, ka shim por satang lai sngi ban kheit biang ïa kiba dang mih thymmai bad la ju kheit lai sien shi taïew. U tit u don ar jait uwei u ba lieh bad uwei u jait pat u ba bthuh bad u tit ba ki rep u dei u ba bthuh u ba ju khot u Oyster.
