Da ki kyndon plie ka FKJGP ïa ka mashin tylliat maw ka Kompeni shna surok Nongjyllieh-Wahkaji

Nongstoiñ, Risaw, 25: Ka jingleit khang tala jong ka FKJGP West Khasi Hills District, ïa ka ka mashin tylliat maw jong ka Kompeni kaba pyntrei ïa ka surok Nongstoiñ Wahkaji ha ka sngi thohdieng jong ka taiew ba la dep, ka la pynklumar jingmut ym tang ïa ki nongpynïaid ka Kompeni hynrei wat ïa ki nongïalam jong ka Joint Action Committee kaba dei ka synjuk jong ki riew rangbah jong ki shnong kiba don ha shilynter katei ka surok naduh Nongjyllieh, ter ter haduh Wahkaji.
Halor katei ka jingleit khang tala jong ka FKJGP ïa katei ka mashin tylliat maw, ka la mih ruh ka jingïakynthoh kaba jur lyngba ki rynsan social media kaba la pynlong ïa ki nongïalam ka FKJGP, ba ki hap ban khot ïa ki nongïalam bad ki dkhot jong ka Joint Action Committee, ba kin wan mih ha ophis trei kam ka seng ban ïapynbeit halor katei ka kam. Kumta ha kane ka sngi balang ka 25 tarik Risaw na ka liang ki nongïalam bad ki dkhot jong ka JAC ki la wan khrui ban ïakren bad ka seng FKJGP halor katei ka kam.
Ha ka jingialang la don lang u bah Chnadra Nongdkhar president ka FKJGP West KHasi Hills, ha kaba ki nongïalam jong kiwei pat ki sengbhalang kiba kyrshan ïa ka FKJGP kum ka WKSU bad ka UHM ki la ïadon ryngkat. Ha ka jingïakynduh lang la ïatai sani halor katei ka kam ha kaba ki nongïalam ka JAC, ki la pynpaw shibun ki jingeh ha kaba ïadei bad ka jingkhang tala ïa katei ka mashin tylliat maw.
Na ka liang ki nongïalam ka FKJGP ki la kren shai ba ka jingkhang tala jong ka seng ïa katei ka mashin, kam dei ba ki kwah ban pynthut ïa ka jingpyntrei ïa katei ka surok lane ka jingpyrshah ïa ki kam pynroi kumba la kynthoh da ki briew. Hynrei ka jingkhang tala jong ka seng ka dei halor ki nongrim kiba biang bad na ka daw jong ka jingleh bym kheiñ snep jong ki nongpynïaid katei ka Kompeni ïa ki trai muluk.
Nalor kata ki nongïalam ka seng ki la pynshai ruh ba ka jingkhang tala ïa katei ka mashin, ka dei namar ba ki nongpynïaid ka Kompeni kim shym la pynbiang ïa ki kot ki sla jong ki nongtrei, wat la ka seng ka la leit ban bthah ïa ki ba haba ki wan bylla ha kane ka jylla ki dei ban wan da ka lynti kaba dei, da kaba pynbiang ïa ki kot ki sla kat kum ki kyndon ba la buh da ka sorkar, ym ba kin shu wan rung tuh kum ki masi ki blang. Ha ka jingïatai kaba la neh slem bha na ka liang jong ki baroh arliang ki la poi sha ka jingïasngewthuh jingmut.
U bah Carry Oscar Kharmuti vice president ka FKJGP haba ïakren bad ki lad pathai khubor hadien ba la kut ka jingïalang, u la ong ba na ka liang jong ki baroh arliang da kawei ka sur ki la ïa mynjur lang ba naduh mynta ka sngi kin shah ban plie noh ïa katei ka mashin tylliat maw. Hynrei ki la buh por pat ba hapoh shi bnai ki nongpynïaid ka Kompeni ki dei ban pynbiang ïa baroh ki jingdonkam kiba ïadei bad katei ka mashin bad ruh na ka bynta ki nongtrei.
Lada jia ba ki nongpynïaid ka Kompeni kim kohnguh ki nongïalam ka FKJGP bad JAC kin sa ïashong biang ban ïapyrkhat biang ban leh ïa kaba donkam. Halor katei ka jingïakut na ka liang u bah Zandy Myrthong secretary ka Joint Action Committee ruh, u la kubur ba ka JAC ka sngewïahap ïa ka jingai por jong ka FKJGP ïa ki nongpynïaid jong ka Kompeni ba ki dei ban pynbiang ïa baroh ki jingdonkam ha poh ka por ba la buh, khnang ba kan ym pynthut ïa ka jingtrei bad ba ka Kompeni ka pyndep noh kham kloi ïa katei ka surok.