Nongpoh, Risaw, 25: Ki paidbah nongshong shnong jong ka thaiñ Umdap naduh ki kynhun sengbhalang ba kynthup ïaka FKJGP Shakhoikuna Circle, CoRP 20mer Circle mynta ka sngi kila mih paidbah ban maramot hi ïa ka surok ba jot rathai na 20 mer, Shakhoikuna ter ter shaduh Umdap, namar ka jingiehnoh beiñ jong ka sorkar mynta la bun phew snem kaba la buh jingeh shisha ïa ki paidbah nongleit nongwan khamtam haka pang ka shitom.
Kumba long mynta ka jinglong jingman jong utei ka surok ka la pynsyrtok shisha ïaki paidbah ba leit ba wan namar ka jingsniew shaba palat ba la dap ruh satang da ki thliew ki syar ha shilynter jong utei ka surok ba haduh mynta ym pat idak eiei ban pynbha lane siangrong ïa ka surok ba kum ki paidbah ryngkat ki sengbhalang ki la shim hi ïa ka sienjam ban lum ïa ki shnong naduh ki Rangbah Shnong bapher bapher ha katei ka thaiñ ban shim bynta lang ha katei ka jingpynbha bad maramot ïa ka surok namar ka dei kawei na ki surok ba donkam bha ha katei ka thaiñ khamtam ba pynïasoh ruh ïa ki shnong khappud bad ka Assam.
U President jong ka FKJGP Shakhoikuna Circle Bah Khil Maring u la ong ba kane ka jingsniew ka surok ka la pynjynjar bad pynsohsat ïa ki paidbah nalor ka jingsniew, ki don ruh ki jaka ba long pung ktieh ba wat ki kali ki shem jingeh ban ïaid kumba kane ka surok ka dei kaba kongsan bha ha katei ka thaiñ ba pynïasoh ruh bun tylli ki shnong bad kaba poi ruh sha ki shnong khappud ka Meghalaya bad Assam shaduh ki thaiñ Marmaiñ, hynrei la shu leh klet mynta la bun phew tylli ki snem khlem siang rong lane pynbha bad dei halor katei ka nongrim ba kum ki paidbah kila mih hi ban maramot ïa kane ka surok na ka bynta ka jingbit jingbiang jong ki paidbah.
U la ong ruh ba bun na ki paidbah ha ka thaiñ ki dei kiba im da ka rep ka riang bad kumba ka surok ka dei u budlum ka roi ka par bun na ki paidbah ki shem jingeh wat ban pynpoi ïa ki mar rep jong ki sha ki ïew ki hat, da kaba kyrpad ruh sha ka Sorkar ba ka dei ban leh eiei ban pynmang skhim bad ban siangrong ïa katei ka surok ban pynsuk ïa ki paidbah ha ka leit ka wan.
