Nongstoiñ, Risaw, 25: Ka ophis jong ka KVK West Khasi Hills District, Nongshillong ryngkat ka jingïatreilang bad ka Agricultural Technology Management Agency (ATMA), West Khasi Hills ki la pynlong ïa ka training cum exposure visit prokram ha ka 25 tarik mynta u bnai KVK-West Khasi Hills ha kaba la ïashim bynta da ki 52 ngut ki nongrep kylleng na ka Mairang, Mawthadraishan bad Nongstoiñ C& RD Block.
Ka Subject Matter Specialist (SMS) jong ka KVK-East Khasi Hills ka Kong B. Chyne ka long kum ka Resource person ban ai jinghikai halor ka phang ‘Integrated Pest Management of Vegetables’ ban ai jingpynshai shaphang ki jingpang bad ki khniang kiba pynjulor ïa ki jhur ki mar rep bad ki lad jingsumar jingïada na kine baroh.
Ka la kren bniah halor ka phang Eco-friendly measures and organic practices ban pyndonkam da ki Bio-agents ki Bio-pesticides kum ki Need Products, Trichoderma, ki khniang Beauveria, Trichogramma species bad kiwei de ki lad jingïada.
Ka la pynshlur ïa ki nongrep ban pyrshang da kine ki lad sumar namar ki long kiba treikam bad myntoi shibun bad kyntu ruh ïa ki ban pyndonkam da ki Resistant bad Tolerant Crop Varieties kata ki Variety kiba kham lah ban shah ïa ki jingpang bad ki khniang ban kham pynduna ïa ka jingpynjulor ha ki mar rep.
Ka la khot ruh ïa ki paralok nongrep ban ïashim bynta ha kiwei ruh ki jingai jinghikai kiba ïadei ba ka jingsumar ïa ki jingpang bad ki khniang ha ki jingthung ban shna ka dawai Neem Extract, Bordeaux Mixture ban ïoh jingtip bniah ka ban long ruh ka jinghikai ba myntoi ïa ki ha ka kam rep.
Hadien ka jingai jinghikai la ïalam ïa ki nongrep sha KVK Farm ban sakhi da la ki jong ki khmat ïa ki jingpyni kumno ïa ka Vermicomposting Unit ne ka jaka shna sboh, ka Oyster Mushroom ne jaka rep tit, u jaraiñ ne Buckwheat, Azolla Culture Unit bad khamtam eh kumno ban rep jhur hapoh Polyhouse hapoh ka jingbatai jong u Farm Manager jong ka KVK West Khasi Hills u Bah H. Sungoh.
