Nongstoiñ, Risaw 25: U District Election Officer ka West Khasi Hills District, bah Garod LSN Dykes mynta ka sngi ka 25 tarik u Risaw,2023, u la pyllait ïa ka Video song ka ban long kum ka Awareness halor ka Special Summary Revision, ha ka jingïalang ba la pynlong ha Trysem Hall DC’s office, Nongstoiñ.
Ha kane ka jingïalang la wan ban ïa shim bynta da ki RO, AEROs, BLO Supervisors, SVEEP Core Committee, ki political parties, ki nonghikai ki khynnah skul, ki District heads bad na ka tnad election.
Ka jingpyllait ïa kane ka film jingrwai ka thmu ban wanrah ïa ka awareness ne ka jingkyrsiew thiah ïa ki khynnah samla ka District ki ban sa dap ïa ka 18 snem ka karta ban ïoh ban pynrung kyrteng ïalade ha ka electoral Roll ne ka Special Summary Revision, kaba dei ka qualifying date jong ka 01.01.2024. Ka dei ruh kum shi bynta ban pynïar ïa ka Systematic Voter’s Education and Electoral Participation (SVEEP).
U Deputy Commissioner haba ai jingkren ula ong ba ki Rangbah shnong, ki sordar shnong bad ki nonghikai ki dei kiba kongsan eh kiba lah ban pynsngewthuh ïa ki khynnah samla, ban pynshlur ba kin pynrung kyrteng ha ka Electoral Roll. U la ong ruh ba ka jingjop ïa ka election ka dei namar ba ka electoral roll ka long kaba koit ba khiah.
U la kyrpad jur ïa ki nongïalam shnong ba kin trei shitom da kaba peit bha ïa ki khynnah samla ha la ki shnong ba kin pynrung kyrteng haba la biang ka karta, ban pyntip ba lada la don kiba khlad noh na kino kino ki long ïing, khnang ba yn pyndam kyrteng ïa kiba kum kita bad ban ïa trei lang bad ka tnad election.
Kane ka video song, ka long ban ai mynsiem ïa ki khynnah samla ba kin sngewthuh ïa ka jing donkam jong ka EPIC ban don kata ka jingkitkhlieh ban ïa shim bynta ha kaba jied ïa ki nongmihkhmat.
Ka tnad election ka khot ka wer ruh ban pyndonkam ïa kane ka video ha manla ki platform lyngba ki social media, khnang ba ka yn lah ban pynïar ïa ka electoral awareness wat sha ki jaka ba kyndong bad ba jngai. Ha kane ka programme la ïoh ruh ban sakhi ïa ka jingrwai bala ai da i Jopsilin Khardewsaw kaba dei halor katei ka mat election.
Kiwei kiba la ai jingkren ki long bah HK Thabah MCS Addl DC (EL) ba la ai ïa ka jingkren pdiang bad jingkren lamphrang, bah R Kharmujai Assistant System Engineer (EL) bala batai ïa ki claims bad objection lyngba ka power point presentation bad bah V Swer MCS Addl DC ba la ai ïa ka jingkren pynwai.
