Da ki klur ki wan thong ïanga, tangba ngam ngop, phla sa u MDC Mylliem

Shillong, K’Lyngkot 09 : U MDC ka Mylliem, Bah Ronnie V Lyngdoh ha ka sngi Nyngkong u la ong ba ki don haduh saw ne san tylli ki party kiba wan ban thong ïa u da ki klur tyngka thik kumba la thad pyrthei da u MLA ka Mawkynrew, Bah Banteidor Lyngdoh dang shen.
“Tad haduh ka 15tarik u Nohprah ki dang wan khroh biang ïanga bad thong ruh da ki klur tyngka ïanga bad ïa ki samla Congress hynrei ngi khlem treh satia,” ong u Bah Ronnie haba kren ha ka prokram jong ka Mylliem Youth Assembly kaba long ha madan Nongkseh.
Utei u nongmihkhmat u la ong ruh ba ka jingkyntait ïa kitei ki klur tyngka kadei namar kim kwah ban kamai da ka spah bym hok. “Namar lada nga shim ïa ka, kamut nga la shet ïa la ki khun, ka iing ka sem bad ka pateng.”
Shuh shuh u ong ruh ba kum u MDC um lah satia ban ai pisa mar 5000 tyngka hynrei u don pat ïa ka thong ban wanrah ïa ki polisi kiba lah ban pynmyntoi pat ïa ka lawei.
U ong ruh ba ka saiñpyrthei kam dei satia lano lano ruh kaba jaboh hynrei dei ki briew kiba pynjaboh ïa ka. “Lada ha Dorbar Shnong don uwei ar ba pynjaboh kumno phin kynnoh ïa ka Dorbar Shnong baroh kawei,” u la bynrap biang.
Da kaba kyntu ïa ki paidbah ba kim dei satia ban rai ïa ka lawei jong ki ha kyrteng ka pisa, u Bah Ronnie u la bynrap biang ba lano lano kin ym lah ban weng ïa ka jingduk bad ka jingbiej lada kim lah ban rai ïa ka hok jong ki khlem da shah pynbiej ha ki bor ba nabar.
Utei u MLA barim ka Mylliem ba la bat teng ruh ïa ka shuki Myntri Sorkar ha ka samoi ba la dep u la ong ruh ba ba ki paidbah lada ki sngewthuh ïa ka jingshakri borbah jong ka Congress ki la dei ban pynjop beit ïa ka Congress.
“Dei ka Congress kaba ai ïa ka Sixth Schedule ban ïada ïa ka khyndew ka shyiap hynrei ki party riewlum pat ha ki por elekshon ki ong ka party nongwei. Kadei ka jingshisha ba kadei ka party ba don ha ka ri baroh kawei hynrei ka thaw pat ïa ki aiñ ban ïada na ki heh paid. Peit naduh ka Land Transfer Act ruh leh ka Congress ban khanglad ïa kiwei pat ki jaidbynriew na shabar ban thied jaka ne khaii pateng katba mon ha kane ka jylla,” u la bynrap biang.
Nalorkata, u ong ruh ba kitei ki juh ki seng kiba bein pat ïa ka Congress mynta ki treilang bad ka seng kaba thmu ban pynduh lut ïa kitei ki jingïada.
Shuh shuh u Bah Ronnie u la ong ruh ba ki paid ka Mylliem constituency kim dei satia ban pynshongdor ïalade tang 2.73 tyngka shisngi ban rai ïa ka lawei jong ki ha ka elekshon ban sa wan.
Ha kane ka sngi u la pyntip ruh ba mynta ki la don haduh 3,500 ngut ki samla kiba wan ban pynïasoh sha ka Congress na ka bynta ka lawei jong ki.
U Bah Ronnie ha kane ka sngi u la ïam rangbah ha shwa ba un pynshai paidbah ba ka don ka jingkynnoh ba u la tei iing tei sem ïa ka kmie da ka pisa hadien ba u la jop elekshon.
“I Mei jongnga i ong wat shim ka pisa ba dei jong ki nong Mylliem ban tei iing tei sem. Phi kiba wan por ba ïap i Mei jongnga phi ïohi kumno ka iing ka long. Nga kwah ban pynshai ba nga wan hangne ban shakri hok ym ban tuh ïa ka pisa ki nong Mylliem,” u la ong.