Da ki jinghikai bapher bapher pynlong ka Bethany Hospital ban pynkhreh jingwan u jumai

Shillong, Jylliew 05: Ban pynkhlaiñ ïa ka jingpynkhreh na ka jingwan lynshop jong ki bor ka mariang bad kumjuh ruh ban pynthikna ïa ki lad jingïada ïa ki nongpang bad ki nongtrei ha ka koit ka khiah, ka District Disaster Management Authority (DDMA), ha ka jingïatreilang bad ka Meghalaya Administrative Training Institute (MATI) bad Bethany Hospital, Shillong, ki la pynlong ïa ka mock drill halor u jumai bad kumjuh ka fire emergency kaba la long ha Bethany Hospital ha ka sngi Thohdieng.
Kane ka exercise ka thmu ïa ka jingpyrshang ïa ka jinglah jong ka hospital ban jubab ïa ki jingjia ba long kyrkieh, ki kam ban lah ban pynkynriah ïa ki nongpang bad kumjuh ruh ban ïoh ki jingïatreilang na kiba bun ki shnat treikam ha ka por ba wan ki jinglynshop jong ka mariang.
Kum shi bynta na kine ki jingpynkhreh, ka la don ka jingai jinghikai kaba shisngi kaba la pynlong ha ka 4 tarik une u bnai na ka bynta ki nongtrei ha ka laiñ medical, para-medical bad ha hospital. Ïa kane ka jinghikai la wan ban ai da ki riew shemphang na MATI, Civil Defence bad Home Guards, Fire and Emergency Services, bad DDMA.
Kane ka mock drill ka ai ka lad ban pynkhlaiñ ïa ki lad jingpynkhreh ha ki kyrdan bapher bapher ban pynkhlaiñ ïa ka jinglah ka hospital ban jubab ha ki por ba kyrkieh bad kumjuh ruh ka jinglah ban ai ki lad jingïada ha kiba bun ki liang.