Nongpoh, Nohprah 23: Da ka mynsiem jong ka jingieit bad ka jingkmen shuwa ban pdiang ïa ka Christmas bad snem thymmai, ka HNYF Women’s Wing sengkmie ryngkat ka HNYF Sohkwai Women’s Wing Circle mynta ka sngi ki la leit ban ai sngewbha Christmas bad snem thymmai sha ki longïing baduk ha ka thaiñ Sohkhwai ha Ri Bhoi District.
ïa kane ka jingsam ïa kitei ki jaiñ syaid la pynlong ha ka shnong Umden-la-ang ha ka thaiñ Sohkhwai, ha kaba ki 30 tylli ki longïing baduk ki la ïoh pdiang sngewbha ïa kitei ki jaiñ syaid, kaba dei lyngba ka jingkylluid mynsiem jong ki nongïalam ka HNYF Women’s Wing na ka sengkmie bad na Sohkhwai Circle.
La sakhi lang ruh ha kane ka sngi ba la sam ïa ki jaiñ syaid da ka jingdon lang ka Secretary ka HNYF Women’s Wing sengkmie ka Kong Phrinsibon Kharmuti, u President ka HNYF Northern Region u Bah Hesting Lyngdoh, ka President ka HNYF Women’s Wing sohkhwai Circle ka Kong Wanrihun Namsaw, u Secretary shnong u Bah Amstrong Nongrum bad kynthup kiwei kiwei ki nongïalam bad kitei ki longïing baduk kiba la pynpaw ïa ka jingsngewnguh ïa ka seng HNYF Women’s Wing.
Haba kren ha kane ka sngi, ki nongïalam ka HNYF naduh ka Secretary ka HNYF Women’s Wing sengkmie, ka Kong Phrinsibon Kharmuti bad u President ka HNYF Northern Region, u Bah Hesting Lyngdoh, ki la pynpaw ïa ka mynsiem jong ka jingkmen ba ki la ïoh ïa kane ka kabu ban ïa don bynta bad ki longïing baduk, shuwa ban rakhe ïa ka Christmas bad snem thymmai bad khamtam ka jinglah jong ki ban sam ïa kitei ki jaiñ syaid kaba long shi bynta ka jingai sngewbha ne ïa don bynta bad kine ki longïing baduk.
Ki la buh ruh ka jingkyrpad ba kin pdiang ïa kine ki jingai sngewbha ka seng wat la ki dei kiba rit, namar haba leh ïa kane ka kam isynei ka dei kaba ka seng ka don ïa ka jingangnud ban shakri tang ïa kito ki longïing kiba duna shisha ha ka liang ka ioh ka koit bad kiba shem jingeh na ka jingban ka duk ka kyrduh.
Shuh shuh, ki la pynpaw ruh ba kane ka jingshakri ka seng kam dei satia tang ha kum kane ka por ba don ka jinglehkmen leh sngewbha ban pdiang ïa ka Christmas bad snem thymmai, hynrei ka seng kan dang bteng ruh ka jingshakri ha ki sngi bad ki por ban sa wan, namar ka thong jong ka seng ka long ba peit kyrpang ïa ki paradoh ki parasnam ha ka imlang ka sahlang kiba mad jingeh bad ruh ban wan rah ïa kata ka jingkylla lyngba ka jingïatrei lang ban kyntiew ïa ka imlang ka sahlang, ki la bynrap.
