Shillong, Nohprah 23 : U MDC ba mynta ka Nongkrem, Bah Lambor Malngiang u la kyntait ban aplai tiket na kano kano ka party kaba don ha ka jylla da kaba ong ba ka kham bha ïa u ban ïakhun beit kum u kyrtong shimet ha kane ka elekshon MDC kaban sa long shen ha u Rymphang, 2025.
Une u rangbah uba la bat teng ruh kum u MLA ka thain ha ka samoi 2018 – 2023 u la mih ban aireng na ka UDP ha kane ka elekshon MLA 2023 tangba u la shah rem noh ha u President ka VPP, Bah Ardent Miller Basaïawmoit.
“Kane ka rai ba nga shim ban ïakhun beit kum u kyrtong shimet ka dei hadien ba nga la dep ban ïa syllok lang bad ki nongïalam bad ki paidbah nongkyrshan kiba ju don lang bad nga baroh shi katta ha ka jingïaid lynti jongnga ha ka saiñpyrthei,” u la ong.
Haba jubab halor ka jingkylli, u la ong ruh ba baroh shi katta u khlem don kano kano ka jingïadei kum u dkhot ba pura ha ka UDP watla u la pan tiket bad ïakhun ruh na ka tiket UDP ha ka elekshon MLA. Nalorkata, u ong ruh ba u khlem don satia kano kano ka jingïadei bad kane ka party lane ha ki kam jong ka.
“Ngam dei satia u dkhot ba pura jong ka UDP bad ngam ju leit ruh sha ki jingïalang jong kane ka party bad kim ju khot ruh ïanga. Kumta nga la rai ba ngan ïakhun beit kum u kyrtong shimet,” u la bynrap shuh shuh.
Ka jingiakhun ha kane ka kynti na bynta ka shuki MDC na Nongkrem kan shongshit bha namar dei tang ka VPP kaba la dep ban pynbna kyrtong katba kiwei pat ki party kim pat pynbna satia na bynta kane ka constituency.
