Shillong, Nohprah 23: Ka Employment & Monitoring Cell ka KSU North Khasi Hills District ha ka jingïalam u Samla Banjop Maring kum u Chairman bad ki dkhot hynne ka sngi ka 23 Nohprah 2024 ka la leit ïa kren bad u Dean ka College of Post Graduate Agricultural Centre halor ka jingpynkynriah ïa ka jaka pynlong eksam (Examination Centre) na CAU, Umñam Meghalaya sha Guwahati ha kaba ïa dei ïa ki post laitkam jong ka Lower Division Clerk (LDC), Upper Division Clerk (UDC) bad la Field Cum Laboratory Assistant (FCLA) ban long ha 3 bad 4 tarik u Kyllalyngkot, 2025.
Ka jingleit mih jong ka Employment & Monitoring Cell ka KSU North Khasi Hills District ban ïa kynduh ïa u Dean katei ka CPGAS ka dei halor ka nongrim ba kumno ka tei ka shnat treikam ka don ïa ka ophis hapoh ka jylla Meghalaya hynrei ka buh ïa ki Examination Center shabar jylla ka ban long pynban kum ka jingpynduh mynsiem ïa ki samla wadkam wad jam ha kaba long ruh kum ka jingkhanglad. Ka Cell ka ïeng skhem ruh ha ka nongrim ba balei kiwei ki jylla ki samla wadkam jong kitei ki jylla ki ïoh ban thoh exam ha ka jylla lade jong ki katba ki samla pule napoh ka jylla Meghalaya ki hap ban leit shabar na ka jylla, Ka Cell da lei lei kam lah ban pdiang.
Namar ki Exam Centre la dep pynmih jingpynbna ba ki dei ban long ha College of Post Graduate Studies in Agricultural Sciences, Umïam, Meghalaya, College of Community Science, Tura, Meghalaya, College of Veterinary & Animal Sciences, Selesih, Aizawl, Mizoram, College of Agricultural Engineering and Post-Harvest Technology, Ranipool, Sikkim, College of Fisheries, Lembuchera, Tripura, College of Horticulture & Forestry, Pasighat, Arunachal Pradesh, phewse tang ïa ka Examination centre na Meghalaya la rah sha Guwahati.
Kumta ka Seng mardor ka ïa kren ba ki dei ban pynbeit noh khamkloi khnang ba kan long ka jingmyntoi ïa ki Samla Wad kam wad jam ka Jylla Meghalaya.
Ka Seng ka la pynsngew ruh ba eksam kadei offline bad kam shym don jingeh eiei ban pynlong ha Umïam namar ka jaka ka heh, hynrei kaba kynriah syndet ka pyn artatien ba ka don eiei sha lyndet.
Na ka liang jong ka Seng ka la maham jur ïa une u Dean ba ym bit ban pynkynriah ïa ka jaka pynlong eksam sha Guwahati namar kan long mawjynthut ïa bun ngut ki samla ba wan na ka longïing ba duna ban leit thoh eksam shatei. Shuh shuh la suba ruh ba u Dean u kwah ban pynkynriah ïa ka jaka eksam sha Guwahati ban pynsuk ïa katto katne ngut ki nong Assam ba ïaleh ïa kine ki eksam, ong ka kyrwoh ba la phah da u samla James H. Mawphniang, General Secretary KSU North Khasi Hills District.
