Nongpoh, Kylla Lyngkot 14: Kum ka jingdon bynta lem bad kiba bun ki longiing ba duk jong ka shnong Sohkhwai bad khamtam kum ka jingrakhe ïa u snem thymmai, ka seng Hynñiewtrep National Youth Front, Womens Wing Umling Circle mynta ka sngi kala leit ban ai sngewbha da ki jaiñ kup syaid sha kumba 36 tylli ki longiing ba duk ha katei ka shnong.
Ha katei ka sngi ka jingleit ai sngewbha ïa kitei ki jaiñ kup syaid la sakhi ruh da ka jingdonlang ka kong Rihun Namsaw President, ka kong Bitterly Doloi Secretary, ka kong Phrinsibon Kharmuti Secretary ka Womens Wing sengkmie, u Bah Edilbert Nongrum Secretary ka Northern Region, Bah Sylvester Shangpliang bad kiwei kiwei ki riew rangbah bad nongïalam shnong.
Naka liang ki nongïalam jong ka HNYF Womens Wing Umling Circle haba kren ha katei ka sngi kila pynpaw ba katei ka dei ka sienjam ba kum ka seng kala shim kum ka jingdon bynta lem bad ki longiing ba duk ba rangli jong ka shnong Sohkhwai ki bym iohlad ban thied ïaki jaiñ kup syaid kaba dei ruh shibynta ka jingrakhe ïa u snem thymmai.
Kila pynpaw ruh ba bun naki longiing ba duk ba rangli kim iohlad ban rakhe ïa u snem thymmai bad kim iohlad ban thied ïaki jaiñ kup syaid bad dei halor katei ka nongrim kum ka seng kaba don ka jingkitkhlieh ki la shim ïaka rai ban don bynta lem bad kitei ki longiing watla ka dei tang ka dak bad ka jingïarap barit jong ka seng bad kyrmen skhem ba katei ka jingïarap jong ki kan long ka jingkyrkhu ïa kitei ki longiing baduk ha katei ka shnong.
