Shillong, Naitung 19: Kum shi bynta ban ai mynsiem ïa ki samla pule na Mawkynrew Constituency kiba don hapdeng ki jingpule ha ki kyrdan Bachelor of Technology, Engineering, Law, bad kiwei kiwei ki jingpule kiba ïadei ban pyndonkam da ki kor ki bor jong ki kor Computer, ha ka 18 tarik u Naitung, 2024 katto katne ngut ki samla pule ki la ïoh pdiang sngewbha da ki laptop na u MLA jong ki, u Bah Banteidor Lyngdoh.
Kine ki samla pule kiba dei na ki longïing ba duna ka ïoh ka kot hynrei kiba pule ïa ka kyrdan BTech, Electrical Engineering bad kiwei pat ki kyrdan. Napdeng kine ki samla pule don ruh ka samla kaba ym lah ban ïohi ki khmat hynrei kaba don pat ïa ka mynsiem ban ïaleh ban pyndep ïa ka jingpule jong ka ha ka kyrdan BA.
Shuh shuh u MLA u la aiti ïa ki kor Computer ryngkat ki Printer sha ki bor pynïaid jong katto katne tylli ki skul na katei ka thaiñ bad aiti ruh ïa ki kor suh jaiñ sha ki SHG bad ki riewdonsap ha ka kam suh jaiñ.
Ha ka jingïalang kaba lyngkot, u Bah Banteidor u la ong ba ban trei hapoh ka Constituency tang na ka skhim MLA kaba T.2.5 klur shi snem, ka pisa kam pat dap satia khamtam ban bhah lang na ka bynta ban ai jingïarap sha kito kiba donkam eh, bad kum u MLA u hap ruh ban thawlad kumno ban ïoh ïarap da kaba kynshew ruh katto katne bnai ban ïoh ai na ka tulop jong u.
“Ka tulop shibnai ka long 2 lak tam bad hap ban kynshew katto katne bnai khnang ban ïoh thied ïa kine ki kor Computer ban aiti pat sha ki samla pule ka thaiñ kiba donkam eh ïa ka jingkyrshan”, la ong une u nongmihkhmat.
U Bah Banteidor u la ong ba kum u MLA u dap da ka jingkmen bad jingsarong ba ki samla ka thaiñ ki la nangkiew ha ki kyrdan pule bapher bapher bad ka dei ka kamram jong u ban thawlad khamtam ïa ki samla kiba wan na ki longïing ba duna ka ïoh ka kot.
Une u MLA ka Mawkynrew u la ong ba ka ktah ïa u ban ïohi ba ki don ki khun samla kiba poi sha ki kyrdan pule bapher bapher wat hapdeng ka jingduk jingkyrduh ki kmie ki kpa kiba long ruh ki nongrep.
Kumta u la kyntu ïa ki samla pule ban pyndonkam bha ïa kine ki tiar bad u ngeit ba shisien ka sngi ka konstitwensi kan sa mih ki briew ki ban sa shakri ha ki tnat treikam ha ki kyrdan bapher bapher kiba heh.
La pynïaid ïa ka jingïalang kaba lyngkot da u Bah D Kurkalang ha ka jingdon ryngkat lang ki kmie ki kpa jong ki samla pule bad kiba ioh myntoi na ki kti u MLA.
