25 lak synñiang u Dy. CM ban tei biang ïa ka ïngmane Presbyterian ha Mupliang

Jowai, Naitung 19: U symbud myntri rangbah ka sorkar jylla u ma Sniawbhalang Dhar, mynta ka sngi 19 tarik u Naitung 2024 ula hiar dalade sha ka shnong Mupliang, kaba hap hapoh ka West Jaiñtia Hills District, ban leit jngoh bad ban ïa kynduh ïa ki nongïalam bad ki paid riew ngeit jong ka Balang Presbytarian Mupliang ban ai mynsiem bad sngewlem ha ka jingïadei bad ka jing ing ka ïing mane jong ka Balang Presbitarian Mupliang ha ka 22 tarik May 2024.
Ha kane ka sngi, la pdiang sngewbha ïa u symbud myntri da ki nongïalam, ki nongsharai bad ki riewngeit jong ka Balang ki ba kynthup ïa u pastor, ki Tymmen Basan, ki Rangbah Balang bad kiwei de ki nongïalam jong ka Balang.
Hadien ba lah dep jurip ïa ka jinglong jingman jong ka jaka ba don ka ïing mane ba la ing noh, u Symbud Myntri rangbah ula shong ïasyllok bad ki nonïalam jong ka Balang ban ïa pyrkat lang kumno ban tei biang ïa kane ka ïing kyntang ba ki khun jong ka Balang kin ïoh biang ban ainguh aidem ïa u trai kynrad nongbuh nongthaw kumba julong.
Ïa ka jingïalang ba lyngkot, la pynïaid da TBn. W Rymbai, uba la pynpaw ka jingsngewnguh bakhraw ïa u symbud myntri rangbah uba dei ruh u MLA jong ka thaiñ, ba u la kloi ban wan peit da la ki jong ki khmat ïa ka ïing mane jong ki ka ba la ïing noh. U Rangbah Shnong ka shnong Mupliang ma Pyrkhat Sna ha ka jingai jingkrem, ula ïaroh ïa ka jingkitkhia bad jingkloi jong u MLA ban wan ai mynsiem ïa kane ka jingjia ïa ka Balang Presbitarian Mupliang bad kane ka pynpaw ïa ka jingdon jingkitkhlieh jong u kum u nongïalam jong ka thain.
U Symbud Myntri rangbah ha ka jingkren jong u, u la panmap na ki riewngeit ka Balang ba u klem lah ban wan ha kito ki sngi ba dang shu ing ka ïing mane namar ba u leit donkam shabar Ri ha kito ki sngi. Ula pynpaw ka jingsngewsih halor ka jing ing noh kane ka ïing mane bad u sngewthuh ruh haduh katno ki paid riew ngeit ka Balang ki pang ka mynsiem ha ba ki ïa kynduh kum kane ka jingjia.
U la pynkymmaw ïa ki khun ka Balang, ba kim dei ban duh jingkyrmen hynrei ban shañiah bad aiti ha U Blei trai kynrad ha ba ki mad kum kine ki jingeh namar u kynrad u tip kaei kaba bha tam na ka bynta jong ki.
U la pynkynmaw ruh ïa ka khana jong u Job, u ba dei uwei na ki shakri jong u Blei bad ban shim nuksa na u. Namar, kum ki ba ngeit, ngi dei ban pdiang ïa ki jingtynjuh bad ban ainguh ïa u Blei lada dei ha ki jingkmen lane ha ki jingshem jynjar. U la kyrpad ruh ïa ki khun ka Balang ba kin long ki ba ïa ieid, ki ba sbun bad ki ba ïa tylli khangba kin lah ban shna bad pynïeng biang kham kloi ïa kane ka ïing mane.
Kum ka dak ka jingïasnoh kti lang bad ka balang, u symbud myntri rangbah u la ïathuh ba u lah dep kular ban synñiang 25 lak tyngka ha ka jingïadei bad ka jingshna thymmai ïa kane ka ïing mane ha ka jingwan ud jong ki nongïalam jong ka balang ha kine ki bnai ba la dep.
Ula kular ruh ban dangwad shuh shuh ki lad ki lynti ban ïarap kumno ban pyndep kloi ïa ka jingtei ïa kane ka ïing mane khangba ki khun ka Balang kin ïoh ban pyndonkam kham kloi ïa kane ka jaka shakri Blei. Ha shwa ban pynkut ïa kane ka jingialang ba lyngkot la ïoh ïa ka jingduwai na u Pastor P. Thubru.