Da ka song pisa ai sngewbha ka Sorkar ïa kiba jop takma ha ka Khelo India bad Meghalaya Games

Shillong, Rymphang, 05: Ka sorkar jylla hapoh ka jingïalam u Conrad K. Sangma kum u Myntri Rangbah, hynne ka Lah Sngi u Blei ka la pynkup burom ïa ki nongïalehkai sports kiba la ïoh khur takma ha ka Meghalaya Games 2024 bad kumjuh ruh ïa ka kynhun ïalehkai phutbol ka Jylla kiba la wanrah nam da kaba khur takma ksïar dang shen ha ka jingïalehkai phutbol jong ka Khelo Indïa Youth Games 2024.
ïa kane ka prokram pynkup burom ïa kitei ki nongïalehkai la pynlong ha U Soso Tham Auditorium, Shillong, ha kaba la wan sakhilang da u Myntri ka tnat Sports and Youth Affairs u Bah Shaklïar Warjri, ka Myntri ka tnat Health & Family Welfare-Dr. Ampareen Lyngdoh, ka Director jong ka Sports and Youth Affairs ka Kong Isawanda Laloo lem bad kiwei kiwei.
Haba kren kum u Kongsan ha kane ka sngi, na ka lïang jong u Myntri Rangbah u la ai khublei ïa ki nongïalehkai sports kiba la tyngshaiñ bha ïalade bad ruh ïa kito kiba la wanrah nam bad ka burom ïa ka jylla Meghalaya.
“Kane ka taiew ka long kaba kongsan bad baroh shitaïew ngin ïa rakhe lang bad ki samla ha ka jingïalehkai sports, ki nongsengkam lajong, ki nongput nongtem bad manla ki kam ba ngi don baroh shitaïew kiba ïadei bad ki samla”.
U la ïathuh ba ka jingpynkup burom bad ka jingai jingithuh ïa ka jingjop jong ki samla ka long ban kyntiew ïa ki kum ki khlur bad ki nongai mynsiem ïa kiwei pat.
“Nga kwah ban ong ïa ki samla kiba don hangne ba phi long kiba kongsan tam bad phi don ka jingkitkhlieh bad kam dei eh tang ban ïoh ïa ka takma ne ban ïoh khusnam hynrei ban long ki nuksa babha ïa kiwei pat,” u la ong.
U Myntri Rangbah u la pynpaw ruh ka jingsngewnguh ïa ka Meghalaya Sports Olympic Assocïation (MSOA), ïa ki kynhun ïalehkai sports bapher bapher bad ïa ka tnat Sports kiba la noh la u synnïang u bynhei ban pynlong ïa ka lympung ïalehkai Meghalaya Games kaba jop.
“Ki don ki jingtynjuh hynrei manla u snem ngi pynthikna ba ka jingïalehkai kan kham bha bad ngin jop ruh ïa ki jingeh jingtynjuh kiba shah hakhmat,” u la bynrap.
Haba ai khublei ïa ka kynhun ïalehkai phutbol kaba la long ka lahduh ha ka Khelo Indïa Youth Games u Myntri Rangbah u la ong ba kane ka kynhun ka la pynlong ka jingsarong ïa ka jylla bad bynrap, “ki la long ki Lahduh bad kane ka pyni ïa ka sap ka phong kaba ngi don bad kaba ki lah ban kynjoh sha ka thong lada ngi long kiba kut jingmut bad kiba buh hakhmat ïa ka thong,” u la ong.
Shwa kane, u Bah Shaklïar Warjri u la pynkynmaw ïa ki nongïalehkai ba kin pyndonkam ïa ka khusnam pisa da ka jingstad khnang ba kin nang lah shuh shuh ban pynpaw ïa ka sap ka phong ha ka jinglehkai sports.
“Ka sorkar ka la ai jingithuh ïa ka jingtrei shitom jong phi ban jop ïa ka takma hynrei kane kam pat dei satïa kaba kut. Buh ïa ka thong ban kynjoh kham shajrong namarba phi long ka lawei jong ka jylla jong ngi,’ u la ong.