Shillong, Rymphang 05: Ka kynhun ïalehkai jong ka Innings Star lem bad ka Golflink 11 Star ki la ïoh ban khur ïa ka jingjop ha ar tylli ki jingïalehkai jong ka lympung Shillong Cricket League 2nd division hynne ka sngi.
Na ka liang jong ka Innings Star ka la lah ban pynliem ïa ka Sportive Junior da 5 wicket, katba ka Golflink 11 Star ka la jop kput haduh 112 ron ïa ka New Warriors.
Ha ka jingïakhun kaba nyngkong ïa ka toss la jop da ka Inningstar bad ka la jied ban bol nyngkong, na ka liang jong ka Sportive Jouniors ka la lah ban tied 188 ron hap 5 wicket haduh kaba kut jong ka 20 over.
U Bappan Dutta u la khyrwit 73 ron naki 52 bol, katba u Digbijoy Roy u la tied 39 ron naki 32 bol. Napdeng ki rangkawangbol kiba lah ban ïalehkai bha ki long u Joydeep Ghosh (4 over: shah tied 7 ron: khur 1 wicket), u Lukhu K Anal (4 over: shah tied 32 ron: khur 1wicket).
Ka Inningsstar ka la tied pyndep haduh 190 ron ban hap da 5 wicket naki 18.5 over ban khur ïa ka namjop, ha kaba u Lukhu K Anal u la lah ban tied 26 ron naki 15 bol, katba u Deepak Purkayastha u la kamai 63 rron naki 48 bol ban khur syndon ïa ka nam Player off the match.
Haba phai pat sha ka jingïakhun kaba ar, ka New Warriors CC ka la jied ban tied nyngkong hadien ba jop ïa ka toss, bad na ka liang jong ka Golflink 11 Stars ka la buh ïa ka thong da 158 ron, hap 4 wicket haduh kaba kut jong ka 20 over.
Napdeng ki rangtied kiba la kamai bun ron ki long u Ankit Singh Rathor (43 ron naki 40 bol), u Abid Khan (28 ron naki11 bol). Katba ki rangkawangbol kiba la seisoh ki kynthup ïa u Sanjiv Ghosh (4 over: shah tied 39 ron: khur 2 wicket) lem bad u Prasanjit Chanda (4 over: shah tied 34 ron: khur 1wicket).
Haba pyrshang beh ïa katei ka thong ba la buh, ka New Warriors ka la shah pynhap baroh ki 10 ngut tang hadien ba kamai 46 ron naki 10.1over, dei tang u Lakhan Das u ba la kynjoh sha ka phew ron (24 ron naki 25 bol) napdeng ki rangtied.
Dei ki rangkawangbol kiba la tyngshaiñ ha kane ka jingïakhun, ha kaba u Abid Khan u la kawang 3 over, shah tied 9 ron bad khur 2 wicket,n katba u ba tbit duh dei u MD. Ajharuddin u ba la kawang 2.1over, shah tied tang 6 ron bad khur haduh 5 wicket kynthup ruh ïa ka hatrick ban khur syndon ïa ka nam Player off the match.
