Shillong, Rymphang 05: Ka kynhun ïalehkai jong ka Nongrim hills SC ka la khur jingjop hynne ka sngi hadien ba ka la pynjemkhnap ïa ka Mawkhar SC ha ka jingïakhun jong ka lympung 1st Division Football League 2023-24 ba la pynïaid da ka Shillong Sports Association.
Haba phai sha kane ka jingïalehkai kaba long ha madan SSA Ground, Polo ha ka por 2:45 baje nohphaisngi, ka Nongrim hills SC ka la pynliem kput ïa ka Mawkhar SC haduh 2 – 7 kol, ha kaba u Glenny Lynrah u la ïoh ban khyrwit hat trik tam shi kol (4 kol).
Na ka Mawkhar SC ki ar kol la thep da u Banteiskhem Iawphniaw ha ka 85 bad 88 minit. Katba na ka Nongrim Hills SC ki hynñiew kol la wan na u Glenny Lynrah u ba la thep 4 kol ha ka 8, 12, 40 & 44 minit, u Daman Kyrpang Tariang shi kol ha ka minit ba 19, u Supong Lemba Khongwir ha ka 76 minit bad khadduh na u Justerwell Tham ha ka minit ba 80.
Shillong, Rymphang 05: Mynta ka sngi kan don ka jingïakhun semi final jong ka lympung Under-16 Football League 2023-24 ba la pynïaid da ka Shillong Sports Association, bad ka semi final kaba nyngkong kan long hapdeng ka Mawreng SC pyrshah ïa ka Shillong Soccer Scout. Ka jingïalehkai kan long ha madan SSA Ground ha ka por 2:30 baje nohphai sngi.
