Nongpoh, Nailar 31: Ka Ieng Rasong Village Organization, Umrangksai mynta ka sngi kala ioh syndon ban plie ïaka ophis treikam ba pura haka jingrakhe dap 3 snem ka jingïaid lynti jong ka VO ha katei ka shnong kaba kdup ruh kumba 7 tylli ki SHGs naduh bala seng iaka ha u snem 2021.
Ïa katei ka ophis treikam ba pura kaba la shna hurud ka surok bah National Highway 6 la tei lyngba ka skhim MNREGA haka jinglut kumba 7 lakh tyngka bad la wan ruh ban plie paidbah ïaka mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Bah Balajied Ranee MDC ka Nongpoh, Bah D Kharshandi Rangbah Shnong, Kong E Khongjoh President ka Ieng Rasong VO, kong B Syiem bala mihkhmat naka ophis u BDO, Umling Block bad kiwei kiwei ki riew rangbah bad ki longkmie.
Ka kong E Khongjoh kum ka President ka Ieng rasong Village Organisation kala pynpaw ka jingsngewkmen halor ka jingiaid lynti ba 3 snem jong ka VO kaba la ioh pat ban plie ïaka ophis treikam kaba pura ba ki longkmie kin ioh ban pyndep ïaki kam ki jam jong ki, bad haka jingïaid lynti ba 3 snem katei ka VO kaba kdup ruh 7 tylli ki SHG kala lah ban leh shibun ki kam ba bha haka shnong ka thaw bad wat ban wanrah ïaka khuid ka suba jong ka shnong.
U Bah Mayral Born Syiem MLA ka Nongpoh haba kren ha katei ka sngi u ai ka jingïaroh ïa katei ka Village Organisation kaba la ioh ïaka ophis treikam kaba pura bad kadei kawei naki VO kaba donbok tam hadien ba bun naki VO ki kwah ïaka ophis treikam ba pura hynrei kim shym la ioh satia, bad dei da ka jingdon ki longkmie bad ki nongïalam shnong kiba stad la lah ban trei ïa katei ka iing treikam bad pynrung lyngba ka skhim MNREGA bad kyrmen skhem ba katei ka VO kan dang lah ban trei bha ban ai ka jingshakri sha ki para longkmie khamtam ban ïengh hala ki jong ki kjat kumba katei ka jaka ba tei ïaka ophis ka dei ka jaka kaba paka kaba don ruh harus surok bha ba kum ki longkmie ki lah ban leh shibun ki kam ban pynmih pisa bad ban kyrshan ïaki para longkmie ban ieng hala ki jong ki kjat.
