Shillong, Jymmang, 09: Ka Khasi Hills Autonomous District Council (KHADC) kan sa phah da ka show cause notice sha u Paul Leong u trai jong kawei ka Marbaniang-Nichol’s Roy Building kaba don ha Ïewduh.
U Executive Member uba peit ïa ka tnat Trade bad Water Resources jong ka Khasi Hills Autonomous District Council (KHADC) u Rangkynsai Kharbuki ha ka jingïakren bad ki lad pathai khubor ha ka sngi Palei u la ong, “u (Paul Leong) la wan ai ïa ka Court Order sha ka Ophis jong ngi bad hadien ba ngi la peit ïa ka Court Order ngi ïohi ba ka ong, ba u nongujor u don ïa ka hok laitluid ban aiwai ïa ki khyndai tylli ki dukan hadien ba la bud ryntih ïa ki kyndon hapoh ka Khasi Hills District Regulation (trading by non-tribal) 1954 sha ki nongshong dukan bym dei ki trai jylla.”
“Ka pyni kito ki nongshong dukan hapoh ka building jong u (Paul Leong) ki hap ban leh ïa ka Trading License. Na ka liang jong ka ophis kan sa phah da ka show cause notice ïa ki bad lada kim ai jubab ngin sa phah da ka notis ba khang khyrdep ïa ki dukan (Closure Notice),” la bynrap u Bah Kharbuki. “Katkum ka hukum (jong ka Iingbishar Meghalaya High Court) ka la pynksan ïa ngi ka District Council ba uno uno u bym dei ki trai jylla uba leh ïa ka khaii pateng hapoh u pud u sam jong ka Khasi Hills Automous District Council un hap ban da ïoh ïa ka Trading License,” la ong shuh shuh u Bah Kharbuki.
Dang shen u Paul Leong u la phah ïa ka kopi jong ka hukum ba la pynmih da ka Iingbishar Meghalaya High Court sha ka Council hadien ba ki Pulit Enforcement jong ka Council ki la leit khynra ïa ki dukan jong ki bar jylla kiba buh dukan ha ka building jong u.
