Shillong, Jymmang 11: U National Executive Member jong ka BJP uba dei ruh u myntri ha ka sorkar MDA u Bah AL Hek ha ka sngi Palei u la kyntait ïa ka jingkam u Dr Mukul ba ka la don ka jingïakynduh hapdeng jong u shuwa bad hadien ban thaw ïa ka sorkar Meghalaya Democratic Alliance-2 na bynta ban wad lad ban thaw da ka sorkar ba thymmai bym ïalam da ka NPP.
Haba kren sha ki lad pathai khubor, u Bah AL Hek u la kyntait ruh war halor ka jingkam u Dr Mukul ba um kwah satia ba ka sorkar MDA kan wan phai biang ha ka bor.
“Kaei kaba u Dr Mukul u kam ka long kaba bakla shibun namar ngam shym pat ïa kynduh satia bad u hadien ba la thaw ïa ka sorkar MDA,” u la ong.
Kane ka jingkren u Bah AL Hek ka long hadien ba u Dr Mukul u la kam ka don ka jingïakynduh bad u Bah AL Hek shuwa ban thaw sorkar haba ki nongthoh khubor ki kylli la ka dei ka jingshisha ba ka don ka jingïakren hapdeng u Dr Mukul bad ki MLA ka TMC ban pynïasnoh noh sha ka BJP.
U Bah Hek u la ïathuh ruh ba ka jingïakynduh bad u Dr Mukul ka dei ha ka por ba ki shong dihsha lang mynba dang ïaid dorbar mangtyngka ba dang shu kut shen ha kaba u la wer ïa u Dr Mukul ban wan pynïasnoh sha ka BJP.
Shuh shuh u la ong ba ha kaba ïadei bad ka jingthaw ïa ka sorkar dei ki nongïalam na Delhi ba shim rai ryngkat u Myntri Rangbah ka Assam ym satia ka BJP na ka jylla.
