Da ka Seminar ha Delhi ban pynrung ïa ka ktien Khasi ha ka Khyrnit ba Phra

0

Delhi Nailur 29: U MP ka Lok Sabha na Shillong Parliamentary Constituency u Ma Vincent Pala ula ong, ba ka jingpynlong ïa ka National Seminar ha Delhi kaba wan ïashimbynta da ki riewstad bad ki riewshemphang ka long kaba biang bha khnang ban ïoh ïa ki buit ha ka ban lah pynïaid shakhmat ïa ka jingdawa ban pynrung noh ïa ka ktien Khasi ha ka Khyrnit kaba phra jong ka riti synshar ka ri.
Haba kren haka National Seminar ha National YMCA Hostel kaba don ha nongbah Delhi kaba la pynlong da ka Khasi Author Society (KAS) bad ka Hynniewtrep Delhi Association (HTDA), u Ma Pala ula ong, ka long kaba kongsan bha ba ka ktien Khasi kan rung ha ka Khyrnit kaba Phra.
“Kum u MP ka Lok Sabha, nga lah trei shitom ban rah ïa ki mat ïatai hapoh ka ïing dorbar Lok Sabha lyngba ka Private Members Bill, Zero Hour, Resolution hynrei ngam shym la ïoh ïa ka lad ban wanrah sha ka jingïatai bad nga kyrmen ba ngan sa ïoh noh mynta ka kynti. Nga la buh ïa ki jing kylli khnang ba ngan ïoh ai ïa ka Khasi Authors Society ïa kaei kaba nga dei ban leh nga la leh” ong u Bah Pala.
Ula ong ba ka ktien Bodo kam pat dei ban rung ha ka Khyrnit kaba Phra, hynrei namar ka jingbiang ka buit ha ka jingtreikam kane ka ktien ka la ïoh ban rung. Ula kdew ïa ka jingdonkam ban don ka jingïatreilang kum ka Jaidbynriew haba kyntu ïa ka KAS ba kan shimkhia bha ïa kane ka bynta khnang ban lah pynurlong ïa ka jingangnud u paidbah.
Ula ong ba ka Sorkar Pdeng ka la dep ithuh thymmai ïa 22 tylli ki Ktien hapoh ka Ri bad kiba sah mynta ban ïoh ïaka jingithuh ki don sa 38 tylli.
Ula kyntu ruh ba ka long kaba donkam ban ïakren da ka ktien Khasi hapoh Assembly namar ki don ki MLA ki bym pat pyndep ïa ka Matric bad ka long kaba donkam ban kren bad ban thoh ïa ka Khasi bad kane kan pynneh bad kan pynheh shuh shuh ïa ka ktien Khasi.
U Chairman ka KHADC u Bah Lamphrang Blah haba kren kum u Symbud Kongsan, ula ong, haba la duh ka ktien ka jaidbynriew ruh ka la duh noh, kumta ka long kaba donkam ban pynkhlaiñ ïaka ktien Khasi.
“Ha u 2015 la wanrah ïa ka mat ban ïatai hapoh ka dorbar jong ka KHADC ban dawa na ka sorkar jylla ba kan shimkhia ha ka ban dawa pynrung noh ïa ka ktien Khasi ha ka Khyrnit kaba Phra bad ka Sorkar Jylla ha u 2018 hapoh ka jingïalam u Conrad Sangma ka la mynjur ïa ka Resolution hapoh ka ïing dorbar thawaiñ halor kane ka kam” ong u Bah Lamphrang Blah.
U Bah Lamphrang u pyntip ba ka KHADC kala thung mynta ïa da Research bad Development Committee ban wad ïa ki jingtip kiba bniah (Research) halor ka riti ka dustur, ka thoh ka tar bad ka kolshor u Khasi.
U ong ba ka Ktien Khasi ka dei kaba la paw bad kaba suk bad bun ruh ki briew ki bym dei ki Khasi ki la nang ban kren ïa kane ka ktien haba ai nuksa ïa ka jingïoh distinction jong kawei ka samla bym dei ka Khasi ïa ka sobjek Khasi.
Ula pynpaw ruh ïa ka jingsngewkmen ba ka shlem Khasi Learning Center ka la ai jinghikai ïa ki bym dei Khasi ba kin tip bad nang ïa ka ktien Khasi bad ka KHADC ka la ai jingiarap ruh T.2 Lak ïa ka KAS ba kan pynïaid shakhmat ïa ki kam ki jam jongka ha kaba ïadei bad ka ktien Khasi.
Na ka liang ka Myntri Sorkar ka Kong Ampareen Lyngdoh ka la ong, ba ka sorkar MDA kam shym la shongthait halor ka mat jingdawa ban pynrung ïa ka ktien Khasi haka Khyrnit kaba Phra bad dang shen ka Kynhun Myntri hapoh ka jingialam u Conrad K Sangma ka la leit ïakynduh ïa u Myntri Rangbahduh ka ri u Narendra Modi ban ïakren halor kane ka mat.
“Ngi la ai ka dorkhas ha u Myntri Rangbahduh ka ri bad ngi la buh hakhmat eh ïa ka mat jingdawa ban pynrung noh ïa ka ktien Khasi ha ka Eight Schedule jong ka riti synshar ka ri” ong ka Kong Ampareen.
Ka la ong, ba ka long kaba donkam ban ïatai ïa kane ka mat hapoh ka Parliament bad ka long kaba donkam ïa u MP ka Rajya Sabha ba un rah ïa kane ka mat kum ka Private Member Bill ban ïatai hapoh ka ïing dorbar thawaiñ ka ri.
Kala ïaroh ïaka KAS kaba la trei shitom naduh ki snem kiba la dep haba pynpaw ba ka sorkar jylla kan ym shongthait ha ka ban buddien ïa kane ka kam haduh ba kan da urlong.
U Executive Member ka KHADC u Bah Teibor Pathaw, ula ai khublei ïa ka KAS kaba la pynlong ïa kane ka jingïalang ban lum ïa ka jingïalang hangne, khamtam haba ka ktien Khasi ka long kaba la donkam ban ïoh noh ïa ka jingithuh bad ka long kaba donkam ban pyni sha ka sorkar kmie ïa kane ka jingdawa ka jong ka jaidbynriew.

Leave A Reply

Your email address will not be published.