Mawkyrwat, ‘Nailar 06: U District Magistrate jong ka South West Khasi Hills District, Bah Barnari Mawlong katkum ka iktiar ba la pynkupbor hapoh ka kyndon 163 BNSS u mana ïa ka ïaid ka ïeng jong ki briew hapoh 200 meters na u pud u sam ka Indo – Bangladesh kata naduh ka por 6 janmiet haduh 6 baje mynstep ha ka sngi kaba bud.
Namarkata la pynmih khnang ïa ka kyndon aiñ 163 BNSS hadien ba la ïoh jingtip ba ka la don ka pyntieng ha ki jingleit jingwan jong ki kynhun runar ne ki nongleh kam sniew, ki nongkhaïi tuh ha shilynter u pud u sam ka Indo- Bangladesh hapoh ka South West Khasi Hills.
Ym tang kata, la sngewthuh ruh ba kum kine ki briew ki pyrshah ïa ka imlang sahlang da kaba ki la ban pyndonkam da ka jingkhaïi tuh ïa ki Masi/Drok/Kyiad/Shini/kiwei de ki mar ba la khang pyrshah ryngkat ka jingkhaïi beaiñ.
Da kaba pynjari ïa ka kyndon aiñ 163 BNSS kan long ka jingïarap bad tehlakam ïa ka jingpynkheiñ aiñ bad ai ka jingsuk bad ïada ruh na kino kino ki kam kaba lah ban wanrah ka jing-mynsaw ïa ki nongshong shnong.
Namar ka jingdonkam ba kyrkieh kane ka hukum kan treikam mardor bad tat haduh ban da pynmih da kumwei pat ka hukum.
