Nongpoh, Kyllalyngkot 13: Namar ka jingshem jingeh jong kiba bun ki khynnah skul haka thaiñ Mawhati khamtam naka jingsniew bad ktieh jong u surok khamtam haka por slap, u Bah Shemphang Lyngdoh kyrtong ka NPP ha Mawhati Constituency mynta ka sngi u la aiti syndon da ka School Bus sha ka Snohktilang VO ka ban pynïaid ban peit bad khmih ïaka naka bynta ka jingbit jingbiang jong ki khynnah skul ha katei ka thaiñ haka jingïalang kaba la long mynta ka sngi haka shnong Jatah.
Ïa katei ka School Bus la mang pisa lyngba ka Chief Minister Special Development Fund bala sakhi ruh ha katei ka sngi ka jingaiti ïa katei ka Bus da ka jingdonlang u Bah James Sylliang MDC barim ka Mawhati, Bah RM Mukhim Working President ka NPP Mawhati Block, Bah Enel Wahphlang Rangbah Shnong Raitong bad kiwei kiwei ki riew rangbah jong ka thaiñ.
Haba kren ha katei ka sngi naka liang u Bah Shemphang Lyngdoh u la pynpaw ka jingsngewkmen kaba khraw hadien ba u la lah ban pynurlong ïaka jingdonkam jong ki paidbah ka Mawhati ha kaba dei lyngba ka jingshimkhia jong u la ioh ban aiti ïa katei ka Bus hadien ka jingïakren kaba la slem bad u Myntri Rangbah ka jylla ba ki khynnah skul ka thaiñ Mawhati kila donkam ïaka kali ban leit sha ki skul namar ka jingktieh bad pumpum jong u surok kumba ka jingshna surok ka dang ïaid mynta.
U la ong ruh ba kum uwei naki riew rangbah ka thaiñ u la iohi ïaka jingdonkam jong ki khynnah skul ha katei ka thaiñ bad ioh ruh ban ïakren bad ki longkmie bad dei hadien ka jingkyrpad jong u sha u Myntri Rangbah um shym la kyntaid bad pynmang pisa mardor ban thied ïa katei ka bus ban pynsuk ïaki khynnah skul kaba long shisha ka jingkyrkhu kaba khraw ïaki khynnah skul haka leit ka wan bad kyrmen skhem ba katei ka kali kan ai ka jingshakri kaba paka sha ki khynnah skul katei ka thaiñ.
