Da ka nguh ka dem bad ka jingkyrkhu kyrdoh la pyndep ïa ka lehniam Sohjer ka Raid Marwet

Nongpoh, K’lyngkot 29: Ban pynneh pynsah ïa ka riti ka dustur bad ka lehniam tynrai kumba la ïalam naduh ki mynbarim, ka Raid Marwet ba hap ha ka Hima Mylliem Syiemship mynta ka sngi ka la pynkut noh ïa kawei na ka lehniam tynrai ba la tip kum ka Lehniam Shad Sohjer ba la pynlong ha madan shnong ka shnong Baridua ha Ri Bhoi District.
Ïa kane ka lehniam Sohjer la shim bynta da u Syiem ka Raid Marwet u Paiem Ken Syiem bad la don rygnkat ruh u Basan Nongkseh u Bah Nathannial Thangkhiew bad ryngkat ka jingdon lang ki longsan ki mansan ka Raid Marwet bad na ka Hima Mylliem.
Kumba la pynpaw, kane ka lehniam Sohjer ka dei kaba ki leh niam ban ai ïa ka nguh ka dem ïa u lei Surnia bad ruh ban kynmaw burom ïa ki Longsan ki mansan ba kin ai kata ka jingkyrkhu kyrdoh ïa ki jingthung ki jingtep bad ka long ruh shi bynta ka jingainguh ïa u Blei Nongbuh Nongthaw ban ïoh ïa ka jingkyrkhu ïa u ïa u soh nyngkong uba ki lum ki lang na ki kam rep ki kam riang.
Hadien ka jingpyndep ïa kane ka lehnïam Sohjer da u Syiem ka Raid Marwet, u Basan Nongkseh, u la ai ïa ka jingkyrkhu kyrdoh ïa ki khun ki hajar ka Raid ba une u snem 2025 un long u snem uba dap tang da ki jingkyrkhu bad ki khun ki hajar kin bha kin miat ha ki liang baroh.
U General Secretary ka Raid Marwet Sohjer Committee, u Rajesh Shakwa u la pynpaw ka jingsngewkmen bad ai khublei kyrpang ruh ïa baroh ki khun ki hajar, ki longsan ki mansan, u Syiem ka Raid Marwet bad ïa baroh ba ka jingshim bynta jong ki ha kane ka lehniam ka la long kaba jop ba ka Raid ka la lah ban pyndep pura ïa kane ka lehniam Sohjer.