Pynjari kyndon u Majistor halor ki wah ha WKH

0

Nongstoiñ, K’lyngkot 29: U District Magistrate ka West Khasi Hills District bah Garod L.S.N. Dykes IAS, mynta ka sngi u la pynmih hukum katkum ka kyndon 163 jong ka BNSS 2023 bad ka kyndon 223 jong ka BNS Act 2023, kaba khang pyrshah ïa ki kam kiba pynmynsaw bad pynïap ïa ki jingthaw ba im ha um, ha ki wah kiba don hapoh West Khasi Hills, District.
Kane ka hukum ka khang pyrshah ban pyndonkam da ki dawai pynbuaid, ki dawai bih, ne ki tiar pynbthei ha ki wah bad ki wahduid, ka jingshna khlem jingbit ïa ki dam, ki kynroh, ne ki jingpynlang um kiba ktah ïa ki jaka shong jaka sah jong ki jingim ha um, ka jingpynïap ïa ki dohkha da kaba pynkylla ïa ki tyllong um ba kynja mariang, ka jingsait pathar ïa ki kali ha ki jaka ba don um, ka jingkyntur jaka ha ki rud wah bad kino kino ki kam kiba buh jingma ïa ki jingthaw ba im ha um.
Kane ka hukum ka treikam mardor, khnang ban ïada ïa ki um bad ban pynneh ïa ka jinglong jingman jong ki wah bad ki wahduid.
La kyntu ïa ki nongshong shnong ban pyntip sha ki bor kiba dei peit lada ki lap ïa kino kino kiba pynkheiñ. Ha kajuh ka por la kyntu ïa ki nongshong shnong baroh ban ïatreilang ban ïada ïa ki jingthaw kiba im kiba don ha ki wah. Kino kino kiba pynkheiñ ïa kane ka hukum kin shah pynngat ha ka aiñ 223 jong ka BNS Act, 2023.

Leave A Reply

Your email address will not be published.